TVB有個蘇施黃越寸越紅，估唔到入西貢，一樣有個寸到爆嘅燒烤場，同區最貴、無得任食、只限訂枱，一星期更只做Weekend三日，仲同記者講：「我唔鍾意賣廣告！」勁寸。點知結果同阿蘇一樣，越寸越旺場，鬼叫佢真係「好寸」咩！
記者：徐影龍
攝影：王文忠
Model：Fion、BeBe（史納沙）
爆Turbo直飆西貢
天氣凍凍哋，最好就係三五知己圍埋BBQ，而喺網上搜集資料，算係西貢呢間海景園林燒烤場最有口碑。同寶馬借咗架MINICooperS入西貢一日遊，貪佢短車身入彎夠Firm，又有Turbo爆吓大直路。雖然CooperS坐四個人會「親密」啲，不過勝在夠晒力，就算車尾都擺滿攝影器材，FullLoading下表現比其他車仔好得多，玩埋軚波撥片拖波，行咗一輪差啲以為自己揸緊Golf。
到第二個迴旋處，見到西貢郊野公園大大個牌，揀第二個出口，駛入大網仔路。
直駛約兩分鐘，過咗烈士碑就差不多到，見到右手邊斬竹灣個牌就係目的地。
寧靜海景有𡃁仔場
起初喺網上見到呢間燒烤場，$168一位又唔係任食，同我食開$78任燒唔嬲嗰啲比，真係覺得佢好寸，不過去到目的地，一眼望見寧靜遼闊既無敵海景，加埋木地台同埋啲格仔鐵椅，感覺好有歐陸Feel，成班人一邊行一邊猛嗌好靚，已經知道$168唔會蝕得去邊。不過望勻成個場，得十張枱度，同老闆梁先生傾開，原來佢話專登Set咁少枱，「我九成以上做熟客，佢哋都係貪呢度夠靜夠舒服，仲會帶埋紅酒嚟飲㖭。」猶記得上次去任食場，人多兼夾嘈，食物枱亂過亂葬崗，我呢啲過咗三十嘅人，都係Buy呢度嘅氣氛多啲。
10"虎蝦每位一隻，最令我驚喜反而係煙肉車厘茄，一口咬落勁Juicy！（每位$168）
九成客食唔晒要打包
環境無敵，輪到試食物；梁生拎出四人份量，我見到有啲心寒，咁少，點餵飽我個肥仔編輯呀？燒落先知擔心多餘，鋪滿燒烤爐幾次，都只係燒咗一半，跟手仲有個老闆親自整嘅兩斤重鹽焗海鱸（五位以下改為沙甸魚），根本食唔晒，「有生客嚟到都以為唔夠食，其實九成以上都要打包返屋企。」周末要訂枱，聖誕、除夕更要預早Book定，雖然價錢會略加至每位$218，不過大時大節同意中人嚟呢度Hea，咁有情調，點計都抵過你食聖誕大餐畀人掠。
海景園林燒烤場
地址：西貢斬竹灣18E
查詢：81066210
聽住歌嘆熱朱古力
入夜後飲飽食醉，一行幾人揸車入番西貢市，到海傍散步消化吓。市區停車位頗足夠，若果唔去滿記食榴槤班戟，只想到海邊Hea，我會揀泊番新建近碼頭個停車場，出入八達通搞掂，車位闊落易轉彎，好過舊場多多聲。
落到海傍，例牌遇到一大班放狗之人，跟住我哋悶足一日嘅史納沙BeBe，終於可飛甩主人，肆意四圍走，中西美意法日各地狗狗同佢玩一大餐，先開始回復精靈本性。夜晚行海傍有啲凍，肥編輯熟地頭，介紹我哋去臨近碼頭一間叫Freezer嘅小餐廳，嘆番杯熱朱古力咖啡。坐低後，老闆Michael介紹咗款海鮮卷畀我哋，本來已經飽到上心口，但食食吓不知不覺成碟隊晒，唔沾沙律醬已經好好味。
招牌小食之一嘅海鮮卷，用椰菜包住虎蝦、魷魚同龍脷，有別一般酒樓用春卷皮，唔油膩兼較爽口。（$45）
Freezer
地址：西貢海濱公園（近西貢公眾碼頭）
查詢：27911002
短小好彎加Turbo夠惡
MINI揸過好多次，不過今日遊車河，早午晚揸足一日，先真正發覺CooperS嘅過人之處；外形保留Mini經典圓潤CuteCar特色外，BMW為佢加入更多貼近潮流嘅時尚設計，由鬼面罩、頭尾燈到泵把，都跟舊款完全不同，感覺Classic跟科技成功混合，車身實淨穩重感亦係其他的骰車欠缺嘅，單單開車門，你已經充份感受到嗰種沉實用料。
最正係加載Turbo引擎嘅CooperS，油門半開、三千零轉已嚟料，燈位起步或直線加速，感覺有心有力，而且車身較短，入彎時易掌握得多，走過幾個彎後，你會發覺煞車。加速好值得信賴，不期然會越揸越快。小缺點唔係無，如車櫳太細，唔多適合經常坐四個人嘅人士，避震稍硬，遇着凹凸路面會小跳，須要揸實啲盤軚，不過鍾意得CooperS嘅人，都係貪佢夠Sporty夠Racing，唔係要個Turbo嚟做乜。
規格
引擎：1,589c.c.直四引擎＋Turbo
馬力：175hp/5,500rpm
傳動：6前速Steptronic半自動波，前驅
售價：$324,800
查詢：BMWHK（27145271）
