內地保險從業員有資深經驗嘅始終唔多，高薪挖角做大個餅，難免加重經營成本。之不過，中國保監會話時勢艱難，向五大國有保險商，包括國壽（2628）、財險（2328）同中保（966）母公司發出「限薪令」，要求佢哋㩒住荷包應使得使，做5個慳家仔。
番叮「慳家五招」
「慳家五招」唔算新，舊年8月份出過，阿爺𠵱家同大家溫故知新，首先係嚴禁不依章法亂發工資，其次要防止脫離國情畀過高人工，仲有管理層公務消遣開支要切實規管，暫停股權激勵同埋員工持股計劃，薪酬發放亦要加強監督。
總體嚟講，呢啲國企保險商高層日後嘅花紅，唔可以高過底薪2.5倍，加薪幅度唔能夠肥上瘦下，實際嘅慳家大計要喺年底前交份報告。
好似好把炮，但保監實情係冇牙老虎，只可監管呢5個仔做生意嘅手法，於是乎用國情民情做藉口提出薪酬指引，5大阿頭都識做嘅，因為高層任命始終係中央話事。
之不過，平保（2318）董事長馬明哲年薪6600萬人仔，舊年仲榮登《福布斯》「中國上市公司最貴老闆」寶座；但國壽掌舵人楊超就唔夠200萬銀。
民企平保不受限
點解「慳家五招」唔針對平保嘅？皆因保監冇咁大權，唔可以管埋屬民企嘅平保。但阿爺都補鑊話，其他股份制保險公司應該照跟國企辦事，有關股東要發揮監督薪酬作用。
咁係咪煽動平保散戶，扮大衞擊倒巨人哥利亞，齊心投票㩒低馬董人工呢？
李華華
mailto:[email protected]