呢排內置數碼廣播解碼器嘅iDTV越出越多，加埋金融海嘯嘅影響，本港嘅高清機頂盒銷量過去四個月以嚟跌咗三成，點知土炮PixelMagic最近反而逆巿推出兩部內置硬碟高清機頂盒錄影機，其中一部更聲稱以海嘯價發售㖭。
小藍第一時間去試機。PixelMagic總監Nelson話，雖然iDTV來勢洶洶，但弊在冇錄影功能。今次PixelMagic新出兩部機分別係MTV3500同埋旗艦級MTV5000D高清錄影機頂盒，硬碟容量500GB，後者更備有雙高清電視調諧器，賣4,280元。前者單Tuner賣2,980元。佢話，公司今年6月出嗰部500GB嘅機頂盒賣成5,000蚊，呢部新機平咗四成，真係海嘯價，仲縮細體積方便用家擺位。
一按掣睇即時新聞
呢兩部新機都加咗獨家增值功能。有乜增值功能咁巴閉？Nelson話係首創即時新聞，佢仲即刻開機示範，將部機連接寬頻網絡之後，一按掣經電視機馬上睇到《蘋果日報》即時新聞，「睇劇集嗰陣到廣告時間，㩒個掣就睇到即時新聞，仲有天氣報告、賽馬消息、六合彩。」另一功能係支援高清手提攝錄機播放，方便老人家操作，「只要將攝錄機經USB插入部機頂盒，老人家用機頂盒遙控器就好似㩒錄影機咁控制部攝錄機。」
逢周五刊出