不管認股證或牛熊證，星俠近幾年都好少參與，印象中本欄亦從未推介過窩輪或牛熊證，因自問功力未夠，無謂誤人子弟。純炒股票已經幾好玩，何必逼自己投資走偏鋒？
港股急升至目前水平，開始有散戶敢去造淡，群眾意識認為個市短線升咁多，唞氣好正常，況且經濟又唔好，梗係可以造淡。家陣牛熊證流行，換言之昨日開始有不少散戶炒熊證。不過，散戶一窩蜂偏向某一邊，好易為大戶所乘；個人認為，港股後市應未升完，因近日大市成交維持逾600億元，反映動力充足，一廂情願去造淡，從來唔贊成。
內地推出救市措施以來，坊間曾有言論認為內地應刺激消費，不應單靠搞基建。早輪所謂的「家電下鄉」無疑係刺激內需一種，市傳中央短期內再有措施催谷消費，昨日一眾百貨股悉數急升，搶鏡股份有銀泰百貨（1833）、百盛集團（3368）及新世界百貨（825）。今年5月上市的茂業國際（848）昨日亦爆發該股掛牌以來最燦爛升勢，大成交急升20%，收報0.72元。
上望1元
茂業的百貨業務主要集中在國內華南和西南地區，共擁15家百貨店，該公司最近亦進軍山西太原市。茂業升浪剛起，可待股價回氣時吼位跟進，目標1元，以0.55元止蝕。
方星俠