季季新潮流，期期新潮物，身邊有不少朋友同事，話之屋企啲衫多到着唔晒，買咗追貼個Trend先叫潮。唉……都話時裝界係一個無底深潭，差隻腳落去，又有幾多人掹得返出嚟？除了多得時裝潮誌、潮人明星推波助瀾之外，仲要數埋操控這個時裝無底洞的一眾買手，無咗佢哋，大家唔會有機會將潮物據為己有。
記者：葉雪芯
攝影：王文忠
最緊要有Heart
作為香港TrendSetter一分子，絕對不是曾特首講的「做好呢份工」就算，首先要對時裝有一份熱誠。入行五年、現任BauhausBuyer的Tony，由低做起，在Store做Trainee一直爬到上時裝買手位置，一句到尾都是因為「愛時裝」；至於他的助手Lolita卻是因為時裝世家，耳濡目染下變時裝迷而入行。Tony說：「做呢行你問十個有八個都係因為有Heart，做得Buyer等於一腳踢，唔係淨係拎公司錢去買衫就算，尤其做SelectShopBuyer，最緊要識計數，計埋賺定蝕先去入貨，上至會計下至Marketing都要考慮，以一打三！」
是時裝買手，亦是潮流打手，唔通真係靠各位時裝大師畫圖剪布做衫撐得起時裝界咩？沒有Buyer，一個潮流絕對不成事。不過近幾年香港的潮流界似乎不爭氣，除了被人話跟風，仲係一街「潮童」。Tony話：「香港跟日本，日本又跟歐美，潮流就係跟來跟去。暫時亞洲地區都係日本為TrendLeader。當然香港都有型人，只係Mix&Match的心思唔夠，即使走在泰國曼谷街頭，都不難發現穿着有心機的人。其實最重要係了解自己，一身名牌FullGear、或者人着乜你又着乜，除了俾人Label『潮童』之外，唔會有人覺得你有Style囉。」
最唔恨去巴黎
總有一些工作，我們會產生好多幻想：例如空姐、飛機師周遊列國好開心；模特兒日日化妝影相好虛榮；做明星花花世界多姿多采。不少人錯覺認為時裝買手日夜對住靚衫，買貨等於Shopping一樣，比起好多OL的刻板生活Colourful得多。不過實情是辛苦自己知，Tony和Lolita坦言有時亦會麻木，講到如何SetTrend，當然唔似得時裝設計師天馬行空搵靈感：「睇外國雜誌、上網通通唔係娛樂，而係工作一部份，就連聽隻CD都掛住睇Cover造型、行街又會不期然揭人哋價錢牌，職業病囉！身邊都有朋友羨慕我可以一年四次咁去巴黎、紐約、倫敦睇FashionShow，但事實我哋根本唔恨去，去Showroom睇完買完辦已經完成工作。又或者可能平時買衫變了職業，反而Shopping會買少好多嘢，總之家陣奉行貴精不貴多的原則，但又未去到別人口中講的非名牌不買的地步，草根生活如Outlet喪摷筍貨依舊照做，反而係更加精打細算就真。」
大無畏入大師作品
入過無數品牌，講到最得意之作，Tony和Lolita即時想到瑞士牛牌Kozo：「Fabrics和染料好特別，有紙和一些Organic的材料，Details位多，Denim之中算得上是極大膽之作。雖然銷售數字未算好理想，不過口碑很好，好多客人都大讚，所以Keep住有少量入貨。」行到潮流最前面，睇得多間中都會盲目，捉得到外國潮流，又顧唔掂香港市場，有時都會老貓燒鬚，Tony都曾經入錯貨：「多年前曾經入過歐洲牛牌Money，買了一批LooseFit、闊Cut的牛仔褲返來，當時在歐洲的確好Hit，奈何估唔到香港反應好差，又無考慮到東方人身形問題，絕對係入錯貨。」會不會令他卻步，只買香港人接受的服飾？他大無畏地說：「有些品牌我會當它係藝術品，就算着唔到上身，但係Outstanding的時裝大師傑作能引入香港畀大眾見識吓都係一件好事。」
時裝偶像係JudeLaw
望住一身潮日打扮的Tony，原以為他心目中的FashionIcon，不是木村就是中村世紀等日本人辦潮人，殊不知他原來鍾情紳士JudeLaw祖廸羅：「佢着衫真係有一手！Hi-End加Casual襯得好好，DiorHommeSkinny褲配對AirForce1，又俾佢着得出SmartCasual的Gentleman味道。呢啲真正係人着衫，唔係衫着人！」
講到09潮流預告，Tony話：「我睇好幾個日本新牌如Hagan、Patti同Gaunlets，三個牌子的設計師都唔係讀時裝出身，佢哋有啲係Model有啲係時裝精，設計更易配搭和更User-friendly。」
Tony's飛佛
身形關係，Tony偏愛窄Cut，DiorHomme是他的最愛，身上穿的外套恤衫通通細碼，甚至有買女裝Size的衫。
囗JeremyScott金卡冷衫，牌子設計風格很Funny。
囗AnNatasha真皮匙包，皮料越用越靚，價錢只係百幾蚊，抵玩。
囗Redpepper牛仔褲，係我最得意的入貨牌子之一，袋花同車線都做得好好，Cutting亦非常GoodFit。
Lolita's飛佛
做了BuyerAssistant日子尚短的Lolita，平日就係靠睇外國和日本時裝雜誌收料來增加自己的功力。
囗Salad手挽斜孭兩用漆皮袋，想襯型女Look一定會諗起佢，袋款夠大，最重要係價錢平，五百左右入手。
囗pleased企領皮褸，專出LeatherProduct，所以皮的質素非常好，洗水和Cutting亦十分靚。
囗ChristianPeau真皮兔仔，做皮革好出名的一個歐洲牌子，質地取勝，背後有一個拉鏈位。公仔用途本來係放Condom的，但就算唔理個用途係點，放喺床邊都好得意。
09預告
ParisHiltonIconTee
「來年勁Hit妖味重的男裝，ParisHilton的男裝Tee可以去到好姣，瘦身男Carry最啱。」
PublicLibrary×HelloKitty窄身Tee
「幾玩嘢的圖案，Funky的Print來季仲會繼續大熱。」
wwtPhotoPrintTee
「PhotoPrint帶有RockStyle的元素，09春夏相信依然好受落。wwt的PhotoPrint好Unisex，在日本男女都Buy。」
來年男裝會加入不少女裝元素，首先最易睇得出就係用色方面，紅、紫兩色都會被大量採用。
