黃又南為《葉問》再度犧牲色相，在眾目睽睽下露股演出，從組合Shine跳到電影圈獨立發展的他，自知沒帥哥的外貌，也沒當小生的條件，但他絕不放棄，期盼憑着努力，有一天能踏上一線影星之位。
黃又南第一次露股是拍陳果執導的《香港有個荷里活》，他與周迅的替身演床上戲，相比之下，他覺得這次在《葉問》露股比較好受，他日前說：「嗰時係新人乜都唔識，導演叫我『un』咪照做囉。替身個胸塊乳貼跣走咗，見到人哋嗰點，尷尬到唔知點算。今次就要喺一班女臨記面前除褲，成班女個樣好期待咁，前面黐晒膠紙，但都有啲難為情，工作人員仲喺側邊影我前面特寫，用嚟威脅我，不過都係玩吓啫！我要多謝服裝阿姐用絲襪幫我整咗條T-back，係我人生第一次着，原來感覺好唔舒服。」
學拋波仔增值
在電影圈中，又南尚在起步階段，他與徐天佑組成的Shine卻似名存實亡，又南表示並沒放棄唱歌，只是暫時放下，他感慨地說：「唔唱住喇，唱歌好難搵食，唱得好都冇用，個個download冇人買碟，我同天佑傾過，大家同意放低幾年，自己又鍾意拍戲，好想喺電影方面做啲成績出嚟。」
又南自知條件不夠優勢，故此努力在各方面自我增值，為的是有朝能攀上一線影星之位，除了讀演戲課程外，連拋波仔都學了，他說：「可能有人搵我做嘅角色要我拋波仔，唔知㗎！學定冇壞，我唔係靚仔又冇小生樣，但要行到一線唔係冇機會，其實都唔係為咗呢樣嘅，希望有人睇到我嘅潛能，認同我嘅演技。」
採訪、攝影：魯萍 化妝：Phyllis
髮型：P.O.PCarrChengofHairdressing
服裝：Jacket&Sweater：Hareofcollectpoint 首飾：ThomasSabo