我求大俠最憎人食碗面反碗底，呢啲忘恩負義嘅反骨仔，直頭係人神共憤！周二巴甲法林明高球迷就撕海報、燒波衫，邊個反骨仔咁乞人憎呢？咪就係決定09年加盟哥連泰斯嘅「肥哨」朗拿度囉！
法軍免費助操得個吉
肥哨今年2月效力AC米蘭時受傷，動完手術返巴西休養9月康復。當時法林明高見佢冇班落，肚腩脹晒兼面容憔悴，又聲淚俱下要重返球壇，於是免費提供場地、體能專家、設施，畀肥哨減肥操狀態。好啦！日前升班馬哥連泰斯一單眼佢就同意加盟，搞到法林明高到頭來得個吉！
法林明高會長布拉加講：「我哋開晒門請佢嚟，佢唔嚟都算，連句多謝都冇！」又難怪佢咁火，9月至11月底跟操期間，燈油火蠟連埋人工，冇幾十萬港紙落唔到樓。哥連泰斯就精啦！未落實轉會就用朗拿度個名賣波衫，一件531港元，全部76件一眨眼賣晒，穩袋4萬幾蚊港元。
不念舊情大講風凉話
肥哨事後態度同「𡁻完唱」嘅負心漢一樣咁無情，佢話：「我好明白佢哋嘅心情，不過我從來冇定過咩轉會協議，而且我同哥連泰斯有口頭協議！」係！肥哨你巴閉，當日兜踎邊個畀飯你食，𠵱家反面唔認人？知唔知咩叫知恩圖報㗎？就算要換畫過檔，都要念吓舊情，起碼講聲：「對唔住！」
不過，法林明高都只能怪冇帶眼識人，32歲嘅肥哨向來出晒名反骨。97年由巴塞轉會國米玩「罷操」，02年國米千辛萬苦醫番好佢，02世界盃揚威後竟然反面去皇馬。其實法林明高又絕對唔使扯火，正所謂「人在做天在看」，放長雙眼睇肥哨同哥連泰斯下季點折墮啦！