【孽吻焚情之感情的分禮】倪震與周慧敏昨日宣佈的分手消息全城哄動，但身為倪震父親的倪匡事前原來並不知情，昨日當他獲悉兒子決定「引咎分手」後，竟哈哈喪笑說：「寫得咁好玩嘅？引咎辭職呀？咁好笑嘅！」至於身為倪震好友的白韻琴，則認為倪震與周慧敏不是真分手，而是為逃避外界將事情擴大而暫時分開，並揚言覺得兩人的聲明均是出自倪震手筆。
倪震與周慧敏昨日分別發聲明宣佈分手，記者第一時間致電倪震名作家父親倪匡，但他事前原來全不知情，着記者把聲明內容轉告，當他獲悉兒子決定引咎分手，和周慧敏結束情侶關係之後，倪匡竟邊聽邊哈哈喪笑說：「寫得咁好玩嘅？引咎辭職呀？咁好笑嘅！」
白姐姐體諒慧敏
倪震發聲明前可有告訴老父與周慧敏分手？倪匡沒好氣說：「我唔知，你同男朋友分手會唔會話畀你老竇知？關我乜嘢事！點解好似要負社會責任咁？理埋啲咁雞毛蒜皮嘅事，點解唔關心吓神七出艙係咪假！」
身為倪震好友的白韻琴前晚出席中環IFC戲院首映禮時，透露據聞倪震已避走加拿大，記者昨日就倪、周宣佈分手一事致電白姐姐，她深感可惜說：「好為佢哋兩個傷痛，其實唔係咁大件事，周慧敏好識大體，會原諒佢，但太多人批判倪震，周慧敏好心痛，佢哋兩個根本唔想分開，係周慧敏唔想外界再批判佢心愛嘅人，覺得咁對佢男人好唔公平先至咁做。我覺得佢哋唔係分手，係逃避將故事擴大而暫時避開吓，我覺得聲明係兩個人嘅商量，一個人嘅手筆，都係才子（倪震）寫嘅。」
另一方面，17年前因公開表示對周慧敏欣賞和有好感，其後遭倪震連續唱衰三年的劉錫明，昨日聽到過氣仇家與女友分手，他感到十分意外地說：「真係有啲可惜，成19年感情。不過從另一個角度睇，緣起緣滅，當緣份走到盡頭，真係冇辦法挽救，希望佢兩個喺未來嘅新生活，可以活得更好。」
邵國華：係好事
早年與倪震合作投資雜誌生意而反目的邵國華，認為兩人分手不失為好事，他昨在電話中說：「其實係件好事，傳媒將件事放到咁大，佢哋handle唔到而分手，分開一下，佢哋一齊咁多年，關係等於夫妻咁，第時倪生同其他人拍拖嘅過程中先至會深深感受到周慧敏正嘅地方，同樣周慧敏同第個人拍拖嘅時候都會感受到倪震嘅好處，將來佢哋如果再係番埋一齊嘅話，就會更加珍惜對方。」
採訪：林妃、王連連
娛樂資料庫：自命風流頻偷食
自命風流才子的倪震，與周慧敏同居多年已儼如夫妻，但男方即使屢次偷食斷正，最終仍憑其三寸不爛之舌終獲女友原諒。
姚樂碧：倪震因出任亞姐評判而邂逅已婚名媛姚樂碧，98年更為女方的新書寫露骨序言，一句「我和姚樂碧的確在口舌言談上達到過頗為劇烈的高潮」而傳出緋聞。01年姚樂碧公開倪震寫給她的情書，事後倪震即宣佈與姚樂碧絕交。
陳穎妍：有傳自04年至06年期間，倪震不斷發電話短訊狂𠝹無綫女星陳穎妍，事後陳穎妍承認倪震確曾展開追求。
索模Esther：07年4月，倪震又背着周慧敏與24歲模特兒Esther到灣仔嘆牛肉麵，更在女方香閨逗留兩小時，有傳兩人已秘交三個月。
內地名模裴蓓：有指倪震於今年7至8月之間，透過facebook向裴蓓展開追求攻勢，還邀約對方到其開設的桌球室見面，但未獲裴蓓理會。
城大女生張茆：倪震上周六被拍得在蘭桂坊夜店與張茆激吻，事後倪震直認做錯及令女友感到羞恥。
資料來源：《蘋果》資料室
有情歲月：19年情離離合合
周慧敏初出道時與組合Raidas主音陳德彰拍拖，感情穩定，而於88年剛與李嘉欣分手的倪震，因主持港台節目認識周慧敏，即展開熱烈追求並奪得芳心，不過期間周慧敏分別與劉錫明及黎明傳緋聞，至92年周慧敏提出分手。至94年，周慧敏自爆有一日籍男友河村，同年10月倪震被發現與陳法蓉同居。兩年後，倪震與周慧敏被發現同遊三藩市，陳法蓉才承認與倪震已分手，至97年，周慧敏退出娛圈，與倪震定居加拿大。
04年尾兩人雙雙回港發展，兩年後更以夫妻檔搞桌球室生意，惜返港後，倪震緋聞不絕，包括陳穎妍及索模Esther等，07年4月，周慧敏一怒下搬離愛巢。兩人復合未幾，上周六倪震又被發現與城大女生張茆夜蒲激吻，昨日兩人發聲明宣佈分手。
全城熱話--王敏德：唔使咁認真
倪震偷食事件全城哄動，他昨日與周慧敏宣佈分手，更令圈中人驚訝不已。
張達明：有啲可惜，兩個人都係人中之龍，感情嘅事好難講，行差踏錯會有咁嘅機會，希望佢哋兩個將來做番好朋友。（會否打電話與倪震聯絡？）唔會啦，呢啲麻煩事大家都唔想面對，等佢靜吓啦。
傅明憲：聽到呢個消息覺得好可惜，佢哋係金童玉女好相襯，𠵱家啲貓貓冇咗個爸爸㖭，真係好可惜。
羅家英：倪震唔好掟煲，應該箍煲先啱，大家同撈同煲。
張天愛：好好嘅女仔都會遇上壞男仔，可能唔好彩啦！愛情只有黑白，係冇灰色地帶，偷情嘅男女，雙方都要負責。
王敏德：我從來冇試過（偷食）！飲咗酒、飲醉就唔使咁認真，都唔係太大問題，可以原諒，可能飲完好high，所以唔使太serious去睇。
林敏驄：我前晚喺銅鑼灣見到周慧敏，佢喺條黑路行緊，佢冇淚光、冇表面傷痕。（偷食是否抵打？）偷食梗係抵打啦，但扮吓矮仔咪冇事囉。
姚樂碧：真係冇感覺喇！冇意思，呢啲濕碎嘢、雞毛蒜皮嘢，根本唔使勞師動眾去理。（可覺倪震不忠？）第一，我同佢冇聯絡，都唔關我事㗎喇，呢啲人哋嘅事，不值一提囉！
一網熱話--網友：咁嘅男人唔要都罷
對於倪震啜爆城大女生張茆，更為此結束與周慧敏19年情，偷食事件爆發之初，網民已一面倒狠批倪震「世紀賤男」，更有不少人為已屆41歲的周慧敏不值。另一方面，昨日更有網民成立「支持倪震區」，表示咀嘴只屬小事，「外國真係等閒事」云云，引來網民圍攻。
agogo7：倪震好毒，唔會娶佢，拖到周慧敏50歲，人老珠黃，冇市場價值，去滾唔使理你，你咪走囉，仲好，唔使自己開口話分手。
牙~聰：倪震好衰喎，俾人爆咗幾次大鑊，仲去滾。有個咁靚嘅女朋友都唔珍惜，又唔知自己又老又樣衰。
Livergolfer：男人最賤唔係出去滾，最賤係滾得嚟唔畀面個女人。
littlebeebee﹕一次又一次，本性難移，咁嘅男人唔要都罷。
TINTINTAMMY：Vivian真係好慘，40歲人，都唔知飛唔飛佢好。
battle：自認才子，不知所謂！
IKI：周小姐若仍同偽生一齊，就冇藥可救，旁人慳番啖氣暖肚啦。
sinohk：講到飲醉酒就唔關自己事咁，換轉Vivian咁做得唔得呀？啲人真係賤格，一次又一次，死性不改咪就係咁囉！
資料來源：香港討論區、《蘋果日報》網頁