近排手風算順，擂台頻頻命中，偏偏本欄成日唔可以連冧幾口。巴甲、日聯收「咧」，上周揀完西甲唔想再揀，心水突轉向好少埋手嘅德甲波，要嚟緊星期日嘅賀芬咸主場贏史浩克04，一於博佢哋保住個榜首位過冬！
伊比斯域有功架
德甲踢埋呢輪就會進入歇冬期，𠵱家排榜首嘅係升班馬賀芬咸，畢傑睇過佢哋幾場直播，發覺並唔係靠符碌上到呢個位，原來真係有料！賀芬咸暫時同拜仁同分（34分），但就憑較佳得失球差壓住對手坐榜首，只要呢場贏埋史浩克，就可以攬住個榜首，做冬季冠軍！
上場睇賀芬咸作客拜仁，前鋒伊比斯域門前嗰一控一射絕對有功架，難怪𠵱家以18球暫列射手榜首位，有咁高產量肯定唔係靠運。最後場波完場前先輸1:2，其實佢哋水準已經好高，尤其中場大腦沙利荷域好搶鏡，與波斯尼亞同胞伊比斯域夾到暈，再加埋尼日利亞嗰位奧保基，基本上每場可預賀芬咸至少有兩個入球。上場對拜仁，13射6度中框就知攻力幾有質素。
唔好唔記得，賀芬咸現任教頭韋歷克近年都教過史浩克（04-05年），後者近季班底變動唔係咁大，講真韋歷克應該睇得穿隊波嘅強項弱項。至於賀芬咸周三啱啱由華倫西亞免費簽得門將希廸布蘭加盟，雖則未會上陣住，但係睇隊波嘅野心就知好大！
配腳串不來梅「大」
另外，史浩克續缺兩中場史拉爾及堅尼亞，近期作客成績又差，面對擅打主攻嘅川廸、史特加同利華古遜都要輸波，今次到訪德甲攻力最強嘅賀芬咸，輸多一場絕對唔奇，2倍主W捧硬。
過關腳都係推介德甲波不來梅迎禾夫斯堡開「大」，前者喺歐聯啱啱贏完國米2:1，而於主場表現亦好，近3場入10球。禾夫斯堡的米斯莫域及廸施高又大勇，開「大」唔難。文：畢傑
〈早飛倉〉
主菜：星期日28賀芬咸勝（2）@1,000
渾水摸魚過關：星期六13雲達不來梅大（2.15）x星期六63巴塞隆拿勝（1.45）x星期日36里昂勝（1.7）3x1@300
今日早餐價錢：-$1,300
上日賺蝕：-$1,500
早飛倉結餘：$98,999
規則：$100,000本錢，每日買早餐最多動用$5,000，最少$1,000，逢周二、五起身食早餐（見報）。
周末早飛超級重心
星期六6 阿仙奴勝（1.68）
有傳米堡下月將星散，端基及達寧等主力會離隊；阿仙奴逐漸齊腳，料可開W，另可補注入球「大」。
星期六63 巴塞隆拿勝（1.45）
巴塞正選11人除恩尼斯達外可全部列陣，伊度奧又停賽復出；皇馬雖剛換帥兼歐聯大捷，但點計都輸波機會大。
星期日36 里昂勝（1.7）
里昂3場聯賽不勝，射手賓施馬在歐聯已傷癒復出兼有入球，今主場出戰馬賽，是時候帶挈捧場客了。
難啃早餐
星期日9 紐卡素勝[+1]
樸茨茅夫近仗防守漏洞甚大，對上5戰失10球，讓波唔值博；紐卡素射手奧雲及馬田斯腳風頗順，有力搶分。