英超紅遍全球，究竟邊位球星最紅呢？係紅魔仔基斯坦奴朗拿度（C朗）？錯晒！係紅軍球星費蘭度托利斯（F托）。大家係咪覺得意外呢！呢項調查由英超贊助商巴克萊銀行進行，表面好權威，查實就搞噱頭！
全球185國家、32,000名球迷參與呢份網上問卷調查，結果F托係最受歡迎英超球星，第2位係紅軍隊長謝拉特，第3先至係C朗！單單睇香港球迷嘅數據呢？前兩位不變，第3位係阿仙奴嘅法比加斯，C朗三甲不入！
力壓謝拉特C朗
更誇張嘅係歷來最受歡迎嘅英超球星，第1位居然係謝拉特（32%），前曼聯萬人迷碧咸屈居次席（26%），奧脫福皇帝簡東拿得第3（24%）。好彩我求大俠唔係紅魔迷，唔係實激到成晚瞓唔着啫！不過諗諗吓，份調查係咪咁堅呢？
巴克萊份報告都講全球有47.7億人睇英超（佢實話愛斯基摩人都迷英超啦！），但竟然得32,000人上網做問卷，可見調查結果準確極都有限啦！所以本報名家仙道彬（自稱堅貞紅軍迷）根本冇需要全日陰陰嘴笑，正如求大俠所講：「冇代表性嘅！」
我求大俠用5分鐘求其喺本部門做調查，發現紅軍迷有3人（仙道彬、員A、吾中），阿奴3人（蘋果波神、牽牛、金糍）、車仔4人（畢傑、法比奧、艾廸文、藍鑽石）、曼聯1人（亦峰）。以本部門廿幾人計，就算一半香港人口睇英超（350萬），個比例都係1比14萬，相對巴克萊嘅1比14.9萬，代表性都差唔多！當然，今次單嘢曼聯香港區球迷會亦要檢討，個調查10月至12月舉行，你哋都唔鼓動紅魔球迷上網投票，搞到畀利記迷攞晒彩，下年記得做啲嘢啦！