呢排油價插水，座駕嘅耗油量唔使再同你嘅肉痛指數掛鈎，不過今日依然堅持同大家講：慳油！皆因呢個課題夠永恒，即使唔談論低耗油、低排放呢個汽車發展嘅大趨勢，淨係呢排人人要面對「海嘯」嘅驚人破壞力，慳家始終係大前提。為荷包、為環保，點都要學幾道慳油絕招！
記者：黎頌詩
攝影：譚盈傑
鳴謝：SPEC-R（23628007）
要過大家幾招嘅，係鍊車同改裝車都好有心得嘅車手Wing，佢認為用喺賽道上嘅操控技巧，可以應用到街車上。用最少能源發揮汽車嘅最大效能，係任何駕駛者嘅終極追求。Wing指，駕駛技巧，改裝零件及控制載重幾方面都可調節耗油量，不過「要慳油，最基本係要有良好嘅駕駛習慣……」
第一招 苦練「黃金右腳」
就由最基本嘅駕駛習慣講起，由我嚟做反面教材。自問為人性急駕駛技術又唔多得，見無車就踩行油搏命衝，前面一有障礙物，就急不及待靠個Brake。Wing直情就睇到火都嚟，無面畀，「咁揸車，嘥油傷車兼危險啦！」無面，就惟有虛心受教啦。原來踩大油、勁耷Brake，都係慳油大忌。不過要習慣保持均速行車，除咗判斷力外，學習使用右腳亦很重要，Wing就示範咗招「黃金右腳操」，佢話呢招喺辦公室都可以練，目的係令你嘅腳習慣喺操控油門時只作微調，然後喺行車平穩嘅隧道中實踐，將呢招變成你嘅慣性踩油模式。另外，高轉數亦會令引擎增加負荷，耗油量亦增加，Wing建議最好保持1,500轉行車。而喺香港為數不少嘅假日駕駛者就最好每次開車前檢查一下輪胎。
Wing示範「黃金右腳」
第二招 半滿油減磅
相信唔少人都有咁嘅經驗：成車大隻佬，架車明顯鈍鈍哋，惟有畀多少少油。明顯，負重對耗油量有很大影響。有意見認為，放少啲無謂嘢，就可以慳油，不過Wing指出，除非你嘅「無謂嘢」好重，否則影響輕微。我哋都即時搵嚟Wing朋友嘅座駕，睇睇一般人車上嘅「無謂嘢」有幾重。一打開尾箱，果然逼爆，除咗幾個背囊屬非固定「成員」，其他包括一大堆清潔用品及吸塵機等，都係尾箱常客。我哋即時帶呢批「常客」去磅一下，總重10.5公斤，係小朋友嘅重量，原來影響都屬小兒科。Wing話重如幾袋Golf用具，才有影響力。佢反而提醒大家注意油缸。「油缸嘅油都屬負重，所以最好只入至半滿。」
第三招 幫座駕「強身」
日常習慣最難改，搞唔掂？咁就不妨喺提升性能方面入手，簡單嚟講，增強引擎效能，令同等嘅耗油量發揮更強效能，亦係一種慳油方式。火嘴、整流器、點火增強器及省油加速器可以話係提升引擎效能嘅「強身四法寶」。四者嘅功用雖然稍有不同，但整體而言都係增強點火訊號，提升汽油燃燒率，亦達成更高嘅加速效果。Wing建議一般行車8,000至10,000公里便得更換火嘴。一般每支五至六百蚊，配合整流器效果更佳。而點火增強器及省油加速器就適合有較高要求嘅玩車一族，售價介乎二千到二千八左右。當然，三招合璧，先可以發揮最強嘅慳油力量。
谷性能四法寶
