日前熊貓安安咬傷人，點知前晚又有隻鬆獅狗咬傷人，今次主角係關智斌（Kenny），佢前晚喺屋企無端飛來橫禍，慘被鄰居隻鬆獅狗咬傷對手，佢立即去律敦治醫院急症室求醫，經包紮後仲係一手血。
鄰居入唔切𨋢
Kenny噚日喺經理人同家姐陪同下，去到銅鑼灣聖保祿醫院照X光，講番事發經過，佢話：「前晚我帶屋企隻狗散完步之後返屋企，點知鄰居嘅鬆獅狗衝咗入𨋢，但嗰兩個主人就入唔切𨋢，佢隻狗又冇戴口罩又冇狗繩，所以就同我隻秋田犬打起上嚟，我為咗保護自己隻狗，喺拉扯間就俾隻鬆獅狗咬到雙手流血，我隻狗兩隻腳都受咗傷。」雖然Kenny雙手經過包紮，但係依然見到外露嘅小傷口，馮仁昭都戥佢痛。
Kenny對手仲好痛，佢話：「因為雙手都有成三、四十個傷口，醫生話雙手到聽日再腫嘅話，就要做個小手術去放血，之前喺公立醫院已經打咗破傷風針同止痛針，瘋狗針就唔使打住，漁農處捉咗隻鬆獅狗去驗，睇吓佢有冇瘋狗症，冇就唔使打。」Kenny仲話最緊要個人冇事，大家街坊街里都唔想追究。
