股市大跌後，好多股票都跌到殘晒，但跌得快、跌得多，反彈之時亦會彈得快、彈得多。
呢輪好多股票都彈得好勁，唔好認為升咗咁多就唔再追，其實同高位相比，股價即使彈咗一兩倍，仍係處於好低水平。股價有力急彈，正係反映佢已跌到過晒龍，同時係向
投資者提供一個「要留意」嘅訊號──快快趁低追入。睇番噚日50大上升正股榜，升幅就由16%到52%，其中唔少係寶藏，升完可以再升。
冠捷科技（903）係一隻超抵買嘅股份，噚日卒之吐氣揚眉，一彈就18.5%，高收1.6元，升0.25元，成交更大增到3300多萬股，係14個月以來最「墟冚」一日，今次起步，第一個目標係2.2元。
冠捷剛宣佈今年首3季業績，營業額72.5億美元（下同），升19.6%，獲利1.28億元，升3.5%，每股盈利6.3仙。
今年上半年，營業額48.9億元，升28%，獲利9681萬元，升42%，中期息派0.88美仙。
受惠於「家電下鄉」
受金融風暴影響，第3季盈利3119億元，已按季出現倒退，期內付運1250萬台個人電腦顯示器，較上季度少50萬台，但較去年同期增長110萬台。
第3季毛利率有改善，上升1.3個百分點至5.9%，但巴西業務錄得2340萬元滙兌損失，以及擴大電視生產平台令成本上漲，令期內經營溢利率下跌至1.8%。
中央推行「家電下鄉」政策對集團有利，管理層有信心今年可達到付運600萬台的目標，明年更會爭取付運700萬至800萬台。
中銀國際昨天發表最新研究報告，指冠捷目前股價已反映未來數年行業轉壞情況，現價已為價值投資者提供入市機會，維持「買入」投資評級，目標價2.6元，其他大行的目標價由3.0元至3.6元不等。
08年全年，保守估計冠捷盈利1.66億元，減7.7%，每股盈利7.8美仙，折62港仙，全年派息20港仙，減10%，預測PE僅2.6倍，息率12.5厘，極吸引，即使以短期目標價2.2元計，PE亦只係3.5倍。09年有刺激內需的利好作用，盈利可恢復上升。
郭兆誠