湯盈盈早前涉嫌醉駕，撞傷2名駕電單車人士，事後一直情緒低落連夜失眠，不過她現在已收拾心情工作，但為免妨礙司法公正，不敢主動接觸慰問傷者，只能透過傳媒代為傳話，表達歉意及悔意。不過對於涉嫌醉駕案件，她表示未作最壞打算。
無綫前晚安排部份為《歡樂滿東華》節目演出的藝員綵排，包括湯盈盈、鄭欣宜、楊天經、楊盼盼及胡定欣等。其中一個項目《鑽石美人盼善款》，由一眾女藝員在楊盼盼指導下，於凌空鐵架上做出多種高難度動作。
「我冇作最壞打算」
湯盈盈自撞車後一直心情低落，不過為了專心工作她已努力調整情緒，她說：「𠵱家有做瑜伽減壓，心情都OK啦，我唔想對工作分心，所以要放鬆自己，不過我仲有失眠。意外都冇乜嘢回應，因為處理中，我係近十年第一次有意外，所以之前唔知點做好，其實好想問候個傷者，又怕會妨礙司法公正，我真係唔好意思，好唔安樂，我有叫助手代為問候傷者，我都希望透過傳媒問候吓佢哋，我都唔知傷者點樣，我只係知道佢哋唔使留院，真係唔好意思，希望佢哋冇留下陰影。」
問湯盈盈可有陰影？她說：「都有啲，𠵱家等上庭，我冇作最壞打算，但係有諮詢一啲法律意見。」再問到其緋聞男友錢嘉樂可有慰問？盈盈表示現在不理會這些。
另一方面，胡定欣年前與鄭希怡合作演出《東華》時，鄭希怡不慎甩褲露底，胡定欣表示今年她們會穿空中飛人連身衫，一定十分安全，不過她也有叫各姊妹最好打底以防萬一。
欣宜熱舞踩爆凳
此外，鄭欣宜和楊天經合作演出《歡欣經典不停》，要在枱凳上跳上跳落，身穿跌膊上衣的欣宜身手敏捷，她自嘲展示了一對金華火腿，又自爆已經企爆一張凳，她笑說：「我跳嘅時候一身汗，全身濕晒，我都唔好意思，因為舞蹈員要托住我，我都驚跣手。」問到她的舞衣是否性感時，她笑說：「嚇人咩？唔會啦！」
採訪、攝影：卓寶花