男友愛問女友：「你有幾多對腳呀？咁多對鞋！」各位男生，請問你們又有幾多對手？甚麼高達星矢凌波麗如神主牌般一字排開，你夠手玩時我都夠腳着吧！大男人Patrick愛變形金剛，霎時清醒過$200賤賣過心頭好，賣完後悔，再用$300買回同一個變形金剛，唉，男人，何苦呢？
記者：許維雅
攝影：陳盛臣
狂迷編號：008
姓名：PatrickLui（34歲）
年資：8年
總花費：估計約40萬
職業：從事製衣業，身兼變形金剛網盟會長
最珍藏：童年時媽媽買給他的博派首領柯柏文
夢想：希望香港每年都如美國一樣舉辦變形金剛大型展覽，因為大家都知道無機會儲齊所有產品，有機會欣賞別人珍藏也開心。
重播卡通勾起心癮
覺得Patrick熟口熟面？這位變形金剛網盟會長所儲珍藏，分分鐘連代理孩之寶都不及他齊全，自然成為各商場辦展覽借玩具的頭號人物。無疑他儲得瘋狂，但他絕非麻木地自我沉醉的儍小子，亦非儲到甚麼甚麼特別版就自吹自擂的狂人，珍藏量越來越多，全因心癮。
「細個鍾意變形金剛，但只會買一隻半隻玩玩，2000年我先正式開始儲，因為嗰年重做《變形金剛》卡通，好多人想搵番舊版第三代博派首領福特。」Patrick說：「起初一個系列入面，我只會買鍾意嗰幾個人物，有時嫌貴甚至唔會買，但一落旺角就出事，見到減價，抵喎，又掃一堆，整整吓覺得成個系列差幾隻唔完美，又買，跟住又諗儲齊全套先炒得起喎，跟住唔鍾意嘅角色又買埋。」就是這樣，心癮主宰了大腦，「我儲嘢分幾個階段，最初目標決定買齊博派首領，差不多儲齊，發覺好似無乜嘢買會好空虛，之後開始定第二個目標，每完成一個目標都好開心好有成功感，Post上網同人分享。」
掃80萬日圓貨
Patrick有空就上eBay競投，堅持每星期逛一次旺角，定期飛去日本找舊版貨，再去日本Toyshow掃貨才心息，買玩具似乎已成為他生活不可或缺一部份，最厲害一次他去日本掃了80萬日圓貨（約$56,000），幾個紙皮箱一併運返香港。問他歷年總花費，他起初答：「廿萬咁上下啦。」最後才笑笑說：「費事好似咁誇張咁啦，個個月使費都唔同，有時幾百有時過萬，最貴嗰隻兩萬蚊，咁啦，你寫40萬啦。」除貨倉這堆玩具，寫字樓亦放到滿一滿，家裏還有一大堆，老實，我對40萬這數字有保留。
擺陣拍照一小時
多謝史匹堡
買玩具儲模型的男士應該有同感，一旦老婆女友詐型，只怕會走到有她無我的田地。Patrick應付老婆的奇招原來亦不少，「起初佢都有投訴，一來使得多錢，二來無地方，又無話好嬲嘅，係咁哦我囉。有段時間買新玩具返屋企，我會收埋入背囊，靜雞雞放埋入堆舊玩具，等佢唔發覺。點知佢對得多開始認得邊隻打邊隻，『呢盒未見過，我認得！你排過啲玩具呀？』弊，識穿咗，惟有出第二招，話幫人買，或者自己買嘢同時又買嘢送畀佢，等佢有禮物就唔會出聲，哈哈。基本上個個會友都會遇上同樣苦況，有人會專登夜歸等屋企人瞓咗先入屋，有人直頭同我呻：『好慘，今日俾女朋友玩爛咗個新玩具。』其實我已經算幸運，女友都識體諒：『你有個會，要買新玩具都OK啦。』我梗係答係，跟住補句試咗好唔好玩要話畀啲隊友知嘛。」
會長銜頭在身有辣有唔辣，用作招架老婆當然是好事，但要抵擋別人不屑的目光就不成，「以前有啲朋友會不屑我買玩具，覺得咁大個人好似好幼稚咁。我老婆啲朋友直頭會話：『乜人嚟㗎？』好在電影版上映之後，多好多朋友打嚟問隻大黃蜂邊度有得買，大家有共鳴有話題，有番一份尊重感。」我想，Patrick好應該多謝史匹堡，大導演替你找回男人面子與成就感。
儲到迷失方向
電話鈴聲、身穿PrintTee都是變形金剛，無論辦公室或家，總有幾隻放在桌面隨時把玩，看似一條難以回頭的不歸路，但原來當愛變成習慣都有清醒反思時，「儲到自己都唔知儲咗啲乜，根本再無地方放，我有時都會諗係咪要放棄。決定唔玩，最好當然賣晒佢，逐件攞出嚟睇吓賣邊件先，最後件件都唔捨得，惟有繼續玩啦。有時發覺有套少咗幾隻，原來之前覺得唔係咁鍾意賣咗，最後又用貴啲價錢買番，唉！」落力搬出一盒二盒玩具的他，曾經因為工人整翻他的玩具紙盒笑言想殺了她。放棄？又談何容易呢。
珍藏
