金融海嘯洗禮之下，香港地個個都話一定要自救，越近年尾，越多行業趕住散貨盡量攞番啲「茄殊」！除咗食肆有五花八門嘅海嘯套餐，估唔到連貴價跑車都有。繼早前富利堡要錢唔要貨之後，一向象徵品味嘅Lotus蓮花跑車都宣佈減價促銷。
蓮花打出嘅減價名堂，係慶祝佢哋得到《CarPlus》雜誌嘅bestRoadster（最佳跑車）獎，但同時又話因為金融海嘯，令佢哋嗰種「趕絕外母型」兩座位跑車，銷售比舊年同季勁跌，於是決定今日起一連3日，朝九點半至晚十，整番個割價促銷散貨，幾個型號減價6萬至13.9萬元不等，買家仲可以免費去英國蓮花車廠總壇朝聖。
抵唔抵買見仁見智，但咁搞落去，應該好快會見到其他名牌陸續推海嘯優惠，唔知跟住會係邊個呢？