天氣轉冷，如果手手腳腳凍到可以請人食冰淇淋，據中醫說皆因血氣不平衡所致。想補血氣又想暖胃，食蛇進補就係不二之選，所謂「秋風起，三蛇肥」，現在食蛇就最肥美，不過食還食，食蛇進補有無宜忌？今次直接訪問蛇王教路食蛇宜忌。
記者：王震遠
攝影：陳盛臣
食蛇進補有乜好
每逢冬天北風起，總會想起食蛇。南方人一向相信食蛇能治病，亦可進補抵寒。訪問過蛇王林負責人麥先生，原來食蛇還可以行氣活血，老人家食蛇可減輕腰痠背痛。食蛇膽，除有化痰補身之用外，據說今年食過蛇膽，可減少傷風感冒，而血氣暢通，下一年亦會少病痛。蛇肉不但無脂肪，而且有去脂肪作用，營養比一般肉高。就中醫角度而言，食蛇類有助心臟保暖功能；女士們更加應該愛蛇，因為食蛇有滋陰補陽、清血美膚之用，食完皮膚都靚啲。
四大毒蛇
鴛鴦腸蛇片煲仔飯$200
蛇王芬除了食蛇著名外，更有不少小菜選擇，這裏的鴛鴦腸是不少食家的心頭好。鴛鴦腸帶又少許酒味，和濃郁的油香，配合香噴噴的煲仔飯，一絕。
酥炸蛇丸$230
先將五蛇肉起筋，加入鮮蝦、果皮、香檸葉打至起膠，用手搓成球狀以慢火炸至金黃色。蛇丸金黃味香，咬落彈牙，且保留鮮味。
鮑魚燴五蛇羮$65
以五蛇：飯鏟頭、白花蛇、過樹榕、三索線及金腳帶作材料，配合以豬骨、鮮雞、蛇骨等材料煲出來的鮮濃湯底炮製。入口啖啖味道清甜，嗒真味道帶甘。
加料要識做
每當食蛇羮時，總會發現有幾樣配料形影不離，菊花、檸檬葉和薄脆是也。當然不只為賣相添加幾分顏色，原來樣樣都用得有道理。廣東人相信，蛇肉屬燥熱食品，而菊花有清熱明目功效，剛好可以同蛇羮產生調和作用。講到檸檬葉，中醫記載有健胃生津作用，葉汁亦帶有清香味道，就可以減少膩滯感，而且它本身有辟腥味功用。蛇羮加薄脆，情況就好似食粥落幾塊一樣，脆卜卜即時增加口感。另外，食蛇羮一定要知道，咪以為食蛇羮好似碗仔翅，見檯上有醋就起勢落，其實醋本身帶酸性，味道亦較濃，落醋只會蓋過蛇肉味道，再食唔出蛇肉鮮味。
食客話
Arthur：「酥炸蛇丸味道似鱷魚肉，不過較濃味少少，都幾好味。」
Marek：「平時成日嚟呢度食，試過其他都係最鍾意呢度，一向唔鍾意杰撻撻，呢個就啱啱好。」
蛇王芬（25431032）
地址：中環閣麟街30號地下
邊個唔食得蛇
有豐富中醫學常識嘅「蛇王良」主理人良哥指，傷風真係唔好食蛇，「其實病緊所有好嘢、滋補都唔好食，食番清淡啲好。至於孕婦食蛇會令小朋友生蛇呢個問題，根本就無科學根據。」蛇王良的蛇羮特別之處，正是以不同中藥湯底，因應四季天氣轉變作出配合。
栗子花膠蛇腩煲$300
先將蛇腩燜1個鐘，再將配料、發好的花膠及栗子倒進，蓋上蓋以大火再燜10分鐘。蛇腩入味兼夠滑，花膠口感十分爽，煲得熱辣辣夠晒暖胃。
細碗臘味飯、細蛇羮套餐$46
冬天最正食熱辣辣臘味飯，夠溫胃，飯粒亁身又不會太黏，加入臘味吊味更加香。蛇羮足料啖啖肉，而且味帶甘甜，湯底帶少許藥材味道，不會太濃烈。
北菇羊腩、細蛇羮、白飯套餐$55
配合時令食羊肉，夠晒溫胃。將羊肉、南乳、腐乳、冬菇加十幾種配料入煲一齊燜，入味且夠腍身，無半點羶味，送白飯最佳。
陳先生：「本身今次第二次嚟食蛇羮，味道又幾鮮，而且唔會好濃啱我口味。」
蛇王良（25788135）
地址：北角電氣道298號地下A舖