中信泰富（267）炒燶外滙Accumulator事件餘波未了，內地《第一財經日報》噚日引述一名「知曉中信泰富內情的權威人士」稱，搞到呢間老牌紅籌變負資產嘅前財務總監張立憲，竟然係喺一個月內，跟同一個交易員簽落大多數Accumulator合約，而且期間張立憲仲要有半個月出咗差。
又話呢啲一般人都好難搞明白嘅高風險合約，由簽約到合同寄去公司，要整整一個月至搞得掂，張立憲唔係職業炒家，居然敢全部透過打電話落盤，實在非常危險，可以講完全冇風險意識喎。
呢個知情人士仲話，13間同中信泰富簽約嘅銀行，之所以國家開發銀行有份，據講係張立憲主動要求國開行做交易，希望國開行給予協助，原來國開行本身並冇呢個業務喎。之不過華華覺得呢個解釋好牽強囉，牛唔飲水又點㩒得牛頭低？