臨近年尾，球壇頒獎禮接踵而來，上周就揭曉過歐洲金球獎同金童獎。不過，好似08年意甲金垃圾獎就唔攞好過，今年得主就係國際米蘭超級新星、身價高達1,860萬歐元（約1.8億港元）嘅「哥仔」哥利斯馬！
哥利斯馬膺票王
「哥仔」今夏喺摩連奴老點下，以意甲最高身價加盟國米，結果至今入一球，半年未到就被球迷當垃圾掃。合共17,544名意大利投票聽眾當中，有3,001票投畀呢位葡萄牙球星，佔17.11%，大幅拋離05年得主韋利，以及06、07年「雙冠王」阿祖安奴，名副其實係垃圾中嘅極品！
至於邊間球會係08年嘅「垃圾場」呢？原來係有舒夫真高、廸達及朗拿度當選嘅AC，佢哋壓倒有兩名入選嘅同市宿敵國米。不過，計我求大俠睇嚟，呢對米蘭市兄弟儲垃圾認咗第2、3位，相信都冇咩人敢認第1。因為，該獎03年創辦以來，米蘭雙雄嘅球員只係試過04年失手咋！
03年得主李華度、04年係歷高達利（祖記）、05年係韋利（AC）、06年同07年就係阿祖安奴。從呢份垃圾名單，我哋分析到AC衰在買過氣外援，好似李華度、朗拿度，以及今年嘅舒夫真高，佢哋名氣仍在，但高峯已過；國米就衰買新星冇眼光，加埋專買外援乞人憎，於是球迷就用選票作無聲抗議。
09年碧咸走唔甩
AC教練安察洛堤（肥安）同國米教練摩連奴，專門製造意甲垃圾，唔知之前講過想加盟國米嘅曼聯新星路爾斯安達臣，會唔會考慮改變主意呢？1月加盟AC嘅「萬人迷」碧咸，名氣最響、狀態最差，睇嚟09年金垃圾獎，都大有可能係佢嘅囊中物！