殿堂級動作遊戲《波斯王子》（PrinceofPersia），又再於PS3及XB360上登場，今集王子不再孤單，遊戲內加入美女魔法師Elika相伴，畫面無咁單調之餘，玩法亦隨住女角加入有更多變化，再加上今集將會由《Assassin'sCreed》製作小組重新打造，結合兩隻遊戲特色，相信會為這款老牌遊戲帶來驚喜。
記者：許福合
周身爛布似流浪漢
新一集《波斯王子》仍以古波斯神話作背景，並好老土循例捲入光明與黑暗之神、兩兄弟間之鬥爭；「黑神」要破壞世界，王子自然要協助「光神」對付黑暗勢力。
《波》今集仍沿用動作遊戲表達方法，但畫面就採用了3D設計，畫質亦比上集優勝好多，加上有新武器同新系統，都有唔少新意。不過唔少玩家玩過後，都有投訴，唔係遊戲唔夠刺激，而係何解今集王子衣着竟如流浪漢一樣！好彩王子依然有敏捷身手、極強格鬥技，動作亦甚流暢，才無咁傷Fans心。
美女法師Elika幫拖
王子配美女，自然無人反對，遊戲中出現美女Elika，佢其實係一位魔法師，但一反魔法師設定，行動敏捷，出現之後就成為王子好拍檔，甚至好多時候，遇到障礙，如山崖、海邊等更經常做出極驚險高難度動作，必須利用到Elika配合先過到關。而玩家在遊戲中途，都可隨時呼喚Elika上前幫助，當處於攻擊狀態時，Elika更可用魔法攻擊敵人，不過要注意，魔法攻擊唔同拳腳功夫，好難持續，而當美女一旦被打倒，好易進入暈眩，呢個時候既要照顧佢，又要應付敵人會好困難，所以要盡量避免Elika與敵人距離太近。
打飛半空𡁻鑊金
作為動作遊戲，王子本身就有一套基本功夫，例如普通斬擊，雖然容易被擋，但勝在無乜限制，出招容易，另一招相當好用，就係先將對手拋到空中，再使用連續Combo攻擊敵人，不過呢招要埋身先出到，另外亦有硬擋同閃避技巧，但個人就覺得實用性不大。而今集系統最重要賣點，就係連續技使用，威力強大之餘，視覺效果亦相當誇張華麗，而王子與Elika其實各自有專用連續技，戰鬥時可按敵人特性，例如部份敵人可抵抗魔法攻擊，適當互相配搭會有更佳效果。
Profile
遊戲平台：XBOX360、PS3
發行公司：Ubisoft
遊戲類型：動作冒險
遊戲人數：1人
遊戲網址： http://prince-of-persia.us.ubi.com/
售價：$329（XBOX360）/$360（PS3）
