司徒瑞祈（阿水）上月29號去澳門睇完鍾鎮濤演唱會之後，走咗去賭場賭錢，後嚟仲因為同大耳窿借咗20幾萬被「起釘」，唔止要還成80萬債，仲搞到自己喺尖沙嘴開設嘅咖啡室俾人淋紅油，而早排無綫門外俾人噴紅油亦同阿水有關，所以最後佢決定報警求助。
親述事發經過
噚日馮仁昭打電話畀阿水，但一直冇回覆。原來阿水會喺今晚播映嘅《東張西望》中講番事發經過，佢話當晚喺澳門過夜，落咗去賭場賭21點，輸咗幾千蚊，其間有幾個男人走埋嚟同佢搭訕，話幫佢贏番啲錢，阿水初時冇理，後來嗰幾個男人再游說佢玩百家樂，話好易追番啲錢，阿水雖然唔識玩百家樂，但終於忍唔住過去望吓，而嗰幾個男人真係幫佢贏番嗰幾千蚊。之後班男人話佢哋其實喺另一個賭場打工，如果帶客去賭，佢哋會有佣分，結果阿水真係跟咗佢哋去。點知一到就幫阿水攞咗20、30萬籌碼，阿水輸清光返香港之後，班人就要佢還80萬。
阿水話覺得好後悔，佢話：「我唔應該咁易信人，影響到家人、朋友同公司，我好唔安樂，好後悔，我向大家道歉。我同家人同TVB講出真相，得到佢哋支持同安慰，要我勇敢面對，我已經報咗警。將來受到乜嘢懲罰我願意接受，目前我會努力工作。」
蔡淇俊講好話
此外，蔡淇俊噚日到小西灣錄影《道路安全議會之路上零意外》，對於阿水喺澳門賭輸錢而欠下巨債，身為好友嘅蔡淇俊話有打電話畀阿水，不過佢未覆，仲話相信阿水唔係爛賭嘅人，佢話：「阿水好叻理財，平時好慳又儲錢，我相信佢係俾人呃，上星期四喺公司見過佢，當時佢都冇嘢。」