最新的士收費方案──「短加長減」出台之後，是非甚多，上星期三跑馬之夜，綠的在機場東涌發難，小撮紅的趁夜馬散場搞事。前者阻塞機場汽車出市區，後者旨在障礙馬場人士疏散，市民自然一肚氣，部份的士司機以此作為談判議價手段，冇話唔得，全世界嘅罷工工人與抗議示威人士都係採用同一手段嘅，專係選擇在最繁忙時間例如聖誕、新年、大節日之時曠工，示威嘅嘢，務求令到政府頭痛，趁機威脅，就是玩罷工罷市嘅遊戲規則。
但係，受影響之一方，即市民，亦都有權出聲，罵司機搞搞震嘅啫，你估將件事情擺上報紙頭版，就會得到市民支持與同情嘅咩？只有淺薄評論員先會有如此想法，當其政者事實上有權唔須理會一啲無理取鬧嘅人士。
新界西議員梁耀忠與綠色的士有選票關係，不問可知，佢為綠的爭取利益，在情理以內，唔通佢想得罪鄉村選民咩。之不過，佢自己打電話畀運輸及房屋局副局長邱誠武，聲言：「你不打電話畀佢（梁宇榮──新界的士司機權益大聯盟主席），司機話會搞大佢，佢哋會封路。」邱誠武答：「你（梁耀忠）威脅我呀？」
邱誠武結果冇打電話畀梁宇榮，梁耀忠與一啲泛民派議員喺星期五召開記者招待會，指邱誠武要為司機堵塞交通一事負責，根本上係攞嚟講。邱誠武只係一位副局長，何德何能，打一個電話畀梁宇榮就可以順番綠的司機條氣，解除司機塞路威脅？一個可能性係梁耀忠憑議員身份，要在司機面前攞威，叫邱誠武打電話，點知邱誠武唔制，於是趁機玩第二招──項莊舞劍，志在沛公──猛烈攻擊問責制，目的係令曾蔭權難堪，打電話畀邱誠武只是擺佢上枱而已，梁耀忠自編自導鬧劇一場，玩嘢啫！以目前經濟情況嚟睇，的士費咁貴，應該係短減長減先至啱，否則市民點會恨搭的士吖。政府願意實施「短加長減」，已經係維護的士利益，不顧市民荷包㗎嘞，但政府好心着雷劈，唔通政府要下令的士價格短加長加？我哋市民唔通搵自己身體去塞路抗議？