一場金融海嘯摧毀幾多退休夢？！我求大俠以前日寫千字過日辰，𠵱家都要乞求老編畀多幾個字寫下！球壇咪又係一樣，英超倒數第3嘅新特蘭領隊堅尼一辭職，就有33封應徵信寄到，排頭位仲係心臟做過手術嘅侯利亞呀！
高齡兼有心臟病
呢位法國籍前利物浦領隊今年61歲，過晒退休年齡照樣爭飯食；相信以侯利亞嘅資歷，以及同雲格一齊獲得OBE勳銜嘅地位，本地薑「大儍」艾拿廸斯、古比士利等人，趁天未黑行返屋企好過，唔係夜咗搭泥鯭的就晒錢啦！
新特蘭會長昆尼身高近兩米，可惜缺乏遠大視野。上季目睹球隊升上英超順利護級，居然畀曼聯名將堅尼繼續教，搞到一鑊泡。兩人掰面零交流，仲潮到用SMS溝通，要打多過160個字母嘅，就叫秘書代為通傳；日前堅尼終於透過短訊辭職，結束呢段騎呢關係。
3.4億買人再考眼光
昆尼話今次會篩剩3位候選人，其餘信件掉落垃圾桶，仲擔張梯來望到法國嘅侯利亞，總算係有長進。侯利亞教新特蘭絕對夠資格，據講昆尼準備3,000萬鎊（約3.4億港元）資金作擴軍，喺呢個時勢，新特蘭都算夠豪！
咦！新特蘭前鋒施斯同廸奧夫，係侯利亞嘅紅軍舊部喎！弊！我求大俠唔擔心佢嘅心臟，而係信唔過佢對眼！侯利亞可能冇老花，不過佢買人眼光認真差，後期（02年）為紅軍買入戴奧、比斯根等都失敗。
所以呢，昆尼要請侯利亞挽救球隊，就要睇緊啲轉會事宜。侯利亞仲有鋪買法國新星嘅癮㖭！一個唔小心，呢筆錢就掉落咸水海㗎啦！