財政司司長曾俊華噚日到九龍城出席「香港兆基創意書院」開幕禮，同場有恒基地產主席四叔李兆基。但可能鬍鬚曾最近日日喺公仔箱現身賣廣告，呼籲市民畀意見佢做預算案，知名度較四叔高，同學仔與兩人「真情對話」時，大部份問題都係問財爺。
有位同學迷惘於理想與現實之間，就問財爺係咪應該讀番大人認為搵到食嘅學科，放棄讀藝術呢啲「閒科」。財爺話理想非常重要，不過，佢話自己細蚊仔時想做木匠，大個去讀建築，可惜畢業後喺美國做則師唔係幾搵到食，「自己想做嘅，搵唔到食；畀錢我嘅人，卻要我做我唔想做嘅嘢。」後來轉行去教書，82年回港做公務員。
咁即係點呢？八方詮釋，其實都好簡單，理想應該實踐，但係亦都會隨住實際環境和經歷而變化囉，無矛盾嘅。