香港每年暑假都舉行動漫節，武漢上個周末都舉行咗國際網絡遊戲嘉年華，本來咁遠華華都冇乜留意，但見承辦機構係中青基業（1182）就有啲唔同，因為呢間上市公司主席兼大股東成之德，係人大副委員長成思危個姪，佢太太就係榮智健堂妹榮智豐、已故國家副主席榮毅仁姪女。
據講，成之德諗住下年嚟香港搞，香港今年暑假嘅動漫節，5日入場人次超過60萬，咁好景，在商言商成生梗想分一杯羮。
呢個IEF（InternationalE-sportsFestival）今年已經係第3年搞，中青基業首次攞到獨家承辦權，有兩個咁有實力嘅人撐，個嘉年華梗要搞得好好睇睇。
3日入場人次有15萬，成生仲帶埋太座親身到武漢打點，實行夫唱婦隨嘛。