律師同「啤啤熊」有乜關係呢？律師會舉辦法律周噚日揭幕，請咗終院首席法官李國能、律政司司長黃仁龍等人做嘉賓，搞完一輪繁文縟節後，主人家一人送一隻熊人公仔。律師會副會長何君堯解釋，送「啤啤熊」好有意思，代表法律界人士並非一般市民想像中咁高高在上遙不可及，而係好似「啤啤熊」咁可親又平易近人。就係因為咁，一班平日道貌岸然嘅高官、法官，噚日好似大學畢業生咁抱住隻毛公仔影相。
八方相信律師服務客戶時都似「啤啤熊」，至於打完官司，開單收錢時變成點樣就唔敢講嘞。大會又邀請嘉賓簽名留念，可惜頻頻蝦碌，遞畀李官同黃仁龍兩支筆都無墨水寫唔出，律師做嘢都好似咁兒戲，場面都幾尷尬。