近排幾單新聞，令到好多對香港政府失望嘅人，更顯絕望。由包機事件，到的士塞東涌，一班高官個膊頭有幾「斜」，大家心中有數。金融海嘯，打工仔冇做錯嘢都驚飯碗不保，但一班高官做錯嘢都唔怕俾人炒！香港人只有一連串無奈。
即使有辦你睇，只要做到公務員，做嘢唔使負責任，但敏妮相信作為有智慧嘅靈長類動物──人類，就算對人唔負責任，都要對自己負責。
港美法律孰優孰劣
唔講唔知，喺香港買保險，如果證明到係推銷手法有問題，有誤導成份，當有乜事發生，保險公司要孭番法律責任。不過原來喺美國，即使證明係推銷手法有問題，但如果喺保單生效兩年後，投保人唔提出保險公司誤導，之後有乜事發生，保險公司都唔使孭法律責任。
對投保人嚟講，香港嘅法制似乎完善啲，但講公平嘅話，香港其實落後過美國。做任何一個投資，買賣雙方都要盡力保障自己，作為投資者或者消費者，點解唔主動去了解自己做咗乜嘢投資，買咗啲乜嘢，而要靠一個無限期嘅金鐘罩為自己設安全網。敏妮記起一句電視廣告對白，「……要識得保護自己」，投資者何嘗不是，做人最重要就係對自己負責任。
再攞雷曼迷你債券嚟講，先唔討論銀行職員有冇誤導呢個問題，單係睇番近呢年，銀行存款利息低到冇可再低，靠食息嘅投資者好受影響，作為銀行職員推介一種「債券」，可以收多幾厘息，雖然位銀行職員可能連自己推銷緊乜都唔係好清楚，但如果唔係雷曼出事，呢個推介又的確可以增加客人嘅投資回報。
回報高風險自然增
問題係大家忘記咗最基本嘅投資概念，就係回報高風險亦會高，本來定存攞一兩厘息，家陣變三四厘，多咗一兩倍，風險增加一兩倍好合理。如果對自己負責任嘅投資者，喺攞多一兩倍回報嘅時候，都好應該問吓自己可唔可以承受高一兩倍風險。
溫敏妮
http://wanmanli.com/blogs/