仲有唔夠兩個禮拜就到聖誕節，可惜一場金融海嘯，搞到本嚟普天同慶嘅聖誕節，都俾華爾街一片愁雲慘霧嘅裁員潮淹沒，就算有得留低嘅打工仔，年尾花紅都分分鐘凍過水。
CNBC報道，嚟緊兩個禮拜，大摩同高盛會公佈今年花紅金額，市場一早預咗會大縮水，結果可能唔止原先估嘅cut一半，實際會更慘情，可能成為花旗國證券業史上，派發花紅最少嘅一年。
唔止cut一半
報道話華爾街花紅重災區，包括可換股債券、投資銀行、股票衍生產品同結構信貸4大部門。
倫敦人力顧問公司NapierScott估計，未來花紅兩極化將更為嚴重，花紅會集中喺一成員工手上。
不過，唔係個個地方都要cut花紅，聽講中東產油國暫時冇咁嘅打算。梗係啦，話晒上半年油價咁高，賺埋唔少。除咗中東，亞洲公司嘅花紅都比紐約同倫敦高，唔怪得咁多金融才俊話要過檔中東、亞洲搵食。