幾個航天英雄嚟香港，最想行街「血拼」兼嘆美食，可惜佢哋肩負為特區政府冲喜重任，身不由己諸多應酬。噚日朝早為「中國首次太空漫步航天展」剪綵，呢個展覽展出物品總值二億元，包括返回艙真品、百幾幅航天照片、喺外太空飄揚嘅五星旗等，又有國產太空食品，不過展品介紹略為慳水慳力，冇說明航天儀器用途，有市民話睇完都唔知啲儀器有乜用。
預設的「對話」
太空人下晝去中大同學生對話，問題都係「整定」嘅，有人問太空人願唔願意喺太空住一年，景海鵬話為咗國家、民族、中國科技、人民利益……住幾耐都冇所謂；翟志剛則話做太空人最大犧牲係冇晒家庭生活，好少時間陪老婆同仔女，不過國家大過天，家人要將就吓嘞。
當局又安排太空人遊維港，官員介紹兩岸景色，當然唔講填海將維港變維河，指住西九幅地，話將來係國際級文娛藝術區。望就咁望啦，八方只怕幾位太空人下次登陸月球時望落地球，仲係見到爛地一塊。