白鴿黨同前綫合併，下星期日改選正、副主席，今次係「聯婚」後首次改選領導層，前綫卿姐以白鴿新丁身份出選副主席，即刻引嚟「狂蜂浪蝶」要拍住佢一齊參選，先有鄭家富向卿姐送秋波，落足鞋油猛話好想同卿姐合作，點知另一個副主席候選人單仲偕快手截糊，暗中冧掂卿姐，最新發展係單雞、卿姐、何俊仁等人綑綁式參選，一於「海嘯大酬賓」，買一搭四益街坊。
單雞今日開記者會，除咗公報同卿姐拍檔外，仲會同埋主席何俊仁、秘書長張賢登、司庫徐漢光一齊出場，美其名係以「內閣」形式參選，等黨員可以一次過揀可以合作到嘅人做領導層，但在支持阿富嘅黨員眼中，卻視主流派玩「綑綁式投票」，借仁哥同卿姐保住單雞，力阻阿富上位。
阿富豈會坐以待斃？佢今日搞街頭論壇造勢，又搵咗元老級嘅黨鞭司徒華做提名人。華叔可動員白鴿黨內支聯會、教協系統黨員，兩股力量足以左右大局，難怪單雞咁騰。單雞向八方透露，已同卿姐密斟幾次，覺得搭埋仁哥一齊選最好，所以用內閣形式畀黨員有多個選擇。據知佢哋已傾好政綱，連宣傳單張都就緒，今日出街，11號黨內選舉論壇舉行前，大家可以多了解佢哋主張。
鄭家富或可突襲成功
白鴿黨內好事之徒話，少壯派今次由有支聯會背景嘅阿富去馬，又有華叔背書，若黨內支聯會、教協系統票源撐阿富，隨時重演當年第一代少壯派成功偷襲，拉張炳良下馬事件；雖則今次改選多咗幾十個來自前綫新黨員投票，但選舉正、副主席係分開投票，佢哋撐卿姐卻唔一定畀票單雞，因此單雞倒灶唔係冇可能；亦有人指徐漢光、張賢登都有教協、支記背景，阿富不見得有着數，雙方各有優勢，呢場大龍鳳真係好戲連場。
至於女主角卿姐，噚日喺電台節目稱，已去信黨員承諾日後會瞓身為白鴿黨籌款，並向市民宣揚民主黨理念，又話應花旗國全國民主協會（NDI）邀請，月底去孟加拉做選舉觀察員，日後亦唔介意去外國「唱好」香港。
mailto:[email protected]