被指冇覆電話畀新界的士業界代表，而引發上星期的士堵塞公路風波嘅運輸及房屋局副局長邱誠武，噚日終於露面解畫。人稱邱武嘅佢話，當晚唔覆call，係因為唔識對方。負責調停嘅街工立法會議員梁耀忠聞言好㷫咁話：「我夠唔識你（記者）啦，咪一樣覆你電話！」梁又批評，作為問責官員嘅邱武當晚並冇覆佢電話交代進展，係失職兼冇政治觸覺。
梁耀忠喺日前爆料，指上星期三晚新界的士堵塞機場公路前，曾經打電話畀邱武，要求佢打電話畀一名司機代表，就機管局派發的士收費單張問題對話，如果唔立刻覆call，的士團體會搞大件事。但邱副局長只係話會處理，仲反問梁：「你威脅我呀？」當晚政府並冇人聯絡有關代表，結果引發一場的士塞機場風波，搞到有的士司機高叫：「邱誠武下台！」
唔識人所以唔覆call
邱副局長噚日出席完港台《城市論壇》後，向在場記者承認，當晚有接梁耀忠電話兼畀咗一個的士司機代表嘅名同電話號碼過佢。但邱武話，唔識得呢位代表，於是將資料交畀同的士團體聯絡開嘅運輸署官員跟進。邱武話當時已回應會處理事件，又話有關官員亦有聯絡嗰位司機代表。
梁耀忠聽完邱副局長嘅解釋，顯得非常勞氣，「唔係一定要識先至打（電話）㗎嘛？我夠唔識你（記者）啦，咪一樣覆你電話！」梁耀忠話唔係針對邱武個人，而係針對官員問責性，「我哋一個月用十幾廿萬請個副局長返嚟，但冇問責性，如果當日盡快解決事件，就唔會越搞越大。」
對於梁耀忠有冇喺電話中「威脅」邱武，兩人噚日都冇再提。邱武只係強調，𠵱家最重要處理新界的士加價申請。其實的士業界一向意見分歧，車行同司機諗法都好唔同，但一出問題可大可小，80年代就曾經發生彌敦道的士罷駛演變成旺角暴亂。
首位被叫落台副局
一落場冇耐就要處理咁複雜嘅問題，又成為首位被叫落台嘅副局長，邱武可算黑仔。佢暫時忍口未算解決問題，點樣平衡各方利益至係關鍵所在。有政圈中人對八方講，除咗的士價格問題，其實各政黨針對嘅係一直權責含糊嘅問責制，近期嘅引發點本來係泰國包機事件被指卸責嘅多位高官，結果接住發生的士罷駛堵塞公路，邱武食到應一應，可能用成桶碌柚葉冲凉都洗唔清啲黑氣。
mailto:[email protected]