台灣電影《海角七號》打破當地票房紀錄，雖然前晚揭曉嘅金馬獎攞唔到大獎，最佳劇情片同最佳導演獎項都輸咗畀《投名狀》，但套戲仍然發揮強大影響力，仲帶旺埋片中喺台灣南部拍攝嘅地點，好多人都慕名要實地去恆春鎮旅遊一番。冧莊做公民黨主席嘅關信基對《海角七號》亦情有獨鍾，不惜透過「主席家書」做平台，客串做影評人，前日更率先喺會員大會上，大談對呢套戲嘅觀感。
冇傳揚地方主義
關主席話，《海角七號》有五億票房，主要係因為套戲有齊晒台灣本土同草根文化嘅美學，又話如果佢識台語，相信會睇得更加過癮，更直言「為海角七號而瘋狂」。雖然有傳大陸因為政治考慮會禁止套戲喺內地上畫，關教授就話套戲其實並冇傳揚地方主義，成套戲嘅主題係包容、自強同超越。
關主席舉例話，戲中樂隊雖然玩嘅係Rock，但仍然容得下人稱國寶嘅茂伯彈月琴，西式飯店可以容得下打扮怪異嘅推銷員大喊大叫，據關主席講，呢啲都係好有心思嘅細節位，想詳細了解關主席講乜，可以去公民黨個網頁睇睇， http://www.civicparty.hk/cp/pages/chairman-c.php。