向來反應唔錯嘅自訂車牌拍賣，亦受金融海嘯拖累。噚日舉行嘅最新一輪自訂車牌拍賣，競投氣氛冷淡，全日拍賣嘅260個自訂車牌中，兩成半車牌冇人出價，結果用底價5,000蚊落入車牌申請者手中。最高成交價車牌「SB」就以17萬蚊成交，其次嘅「KW」就賣到16.5萬。
噚日喺灣仔會展舉行嘅自訂車牌拍賣，競投氣氛唔算熱烈。運輸署話，全日只係售出194個自訂車牌，有66個冇人競投，署方根據法例，將車牌以底價5,000蚊分配畀申請者，包括「HUSBAND」、「H0NS1R」、「JAMES007」、「MUSE88」、「S00FF」、「Y0UNG」等，拍賣總成交280萬幾蚊。