做太空人又要飛天又要不停口勉勵港人逆境自強，唔係個個做得到，不如轉吓口味扮鳥人，有得飛又有得做善事。噚日天寒地凍，YMCA就舉行咗第二屆慈善鳥人飛行大賽，29隊參加者扮鬼扮馬，各自扮成人肉飛行器，喺赤柱卜公碼頭離海面5米嘅斜台飛躍下海，睇吓邊個飛得最遠。
參賽者造型千奇百怪，有人扮豬，有人扮罐頭，更加有參加者百無禁忌，扮棺材飛落海。結果天主教新民書院嘅水上飄隊，以7.24米紀錄奪得青少年組冠軍；扮成狗仔嘅BigBird隊就飛到9.81米，勇奪公開組冠軍，仲創下大會紀錄。活動籌到嘅錢，會幫助天水圍同其他地區嘅弱勢社群，一償搭小型飛機或者熱氣球嘅感覺。