香港《米芝蓮指南》出版，宣告了香港一啲「星級餐廳」。米芝蓮久享盛名，外國Ｋ在米芝蓮榜上有名嘅一至三星餐廳，有晒生意保證，在經濟興旺時期，巴黎啲三星二星餐廳要一早預訂，仲未必訂到位。財務Ｆ試過幾次去巴黎，都訂唔到座位。不過最新消息傳來，話金融海嘯已經打中巴黎，高級消費場所受到波及，訂位易好多喎，起碼啲有錢人嘅荷包大縮水，冇乜心情去巴黎銷金窩先啦，至於使慣錢嘅i-banker，人人驚裁員，更冇心情去巴黎使錢當洗菜。
睇番香港嘅米芝蓮星級餐廳，三星只有一間，就係四季酒店龍景軒（中菜廳），左丁山去過幾次吃午飯，知道此店有兩大優點：（一）無敵維港景，靚勻全港、（二）服務殷勤、無微不至，一間餐廳內，着黑西裝嘅captain級有三四人，輪流巡視，為別家酒店餐廳所罕見。特點又有冇呀，有，就係夠晒貴，點心價貴過福臨門，但是否更靚？咁又未必。龍景軒點心以清淡取勝，好合乎今天之上等人吃健康食譜潮流。建築師Ｆ在此請過左丁山飲茶，便盛讚龍景軒之「齋菜」香港第一（當然價錢亦係第一）。米芝蓮之食評家唔知係唔係睇中龍景軒呢三點，評為三星級。素來刁嘴嘅秘書Ｖ話佢食唔起龍景軒，只去過一次，但印象中，「車氏」與「利苑」之點心好過龍景軒。至於小菜方面，真係要睇個人口味，陸羽十大名菜與鏞記拿手菜式，絕不輸蝕啫。陸羽與鏞記得到一星，大概與環境、景觀完全比唔上龍景軒有關，服務方面亦有所不及。
講西餐，老外會識多好多嘅，二星級之Robuchon位於置地廣場，餐價甚貴，晚餐尤其是，左丁山去過吃午飯啫，大約係每人五百元，聽講最近香港人花錢豪氣大減，每人午飯平均價可以係三百幾蚊就搞掂。至於觀感咯喎，冇乜特別啫，或者我哋唔肯食啲特別正嘢都唔定。如果你冇咁好閒情逸致兼且有銀支持，唔須要跟住米芝蓮指南去逐間試嘅。左丁山對啲一星中菜飯店熟悉好多，幾乎間間去過，其中一間完全不入流，居然入選，真係令人驚奇。食店名字就唔敢講嘞，與老友編輯Ｓ、大記者、秘書Ｖ等人講起，個個都話因為嗰間入選一星，令佢哋對米芝蓮權威性大打折扣。