黎明夥拍章子怡主演嘅陳凱歌新片《梅蘭芳》，萬眾期待，套戲噚日喺內地上映，前日部份戲院已經上咗優先場，香港就會喺下月1號上映，前日黎明同章子怡為咗谷票房，仲去咗成都做宣傳。自宣傳到公映，焦點幾乎集中晒喺黎明同章子怡身上，但係入場睇過嘅觀眾，卻大讚扮演少年梅蘭芳嘅余少群演技出色，大搶黎明鏡。言語間仲話套戲開首40分鐘都好精采，但黎明出場後就顯得淡而無味。
《梅》片開頭嘅戲份集中描寫少年梅蘭芳，余少群演繹喺園子唱戲場面，掌握得恰到好處，好有《霸王別姬》嘅感覺，完全發揮到京劇神髓，但戲份轉到黎明扮演嘅梅蘭芳後，戲味就被內地觀眾狠批由濃化淡。唉，早知陳凱歌拍套《少年梅蘭芳》好過啦！
唱戲曲咪嘴
漢戲出身嘅余少群，佢有戲曲根底，所以無論造手同功架，特別再配埋梅蘭芳兒子梅葆玖嘅幕後代唱，余少群演到好似令年輕梅蘭芳翻生一樣。相對黎明冇呢個先決條件，佢雖然都苦練學戲，但難免遜色，就連部份舞台演出，都要由《霸王別姬》中演少年程蝶衣嘅尹治做替身。章子怡扮演嘅孟小冬嘅演唱部份，就由京劇名家余派余叔巖第四代傳人王佩瑜代唱，換句話說，戲曲部份全部都咪嘴。
