在噓聲中成長的麥浚龍（Juno），星途絕不易行，02年入行奪取新人獎時噓聲四起，大家不喜歡他是因為他挾着「有錢仔」的身份入行。現時Juno可以說是守得雲開見月明，起碼有不少人由討厭他變成欣賞他，故他堅持抱着「少說話多做事」的宗旨走下去。至於對於緋聞女友鍾欣桐，Juno處處維護，可能他感受過被人嫌棄的時光，他於訪問時再三希望大家不要再舊事重提，好讓其好朋友重新發展。
撰文：李珮洳
很多人對麥浚龍的印象都不太好，認為他是有錢仔賺錢買花戴，入行6年的他有三分二的時間都是在反對聲音下成長。雖然大家不接受他，Juno抱着「少說話多做事」的工作態度，漸漸地他的唱片受到認同，大家見到他對音樂的熱誠，並不是玩玩吓。對於感情Juno的緋聞絕對不多，最為人熟悉的只有吳日言以及形象設計Wen8，兩段緋聞可信性極低。
自疑似藝人淫照事件後其緋聞表上多了鍾欣桐（阿嬌）的名字，而且是傳得最耐的一位。
每周聯絡兩、三次
Juno曾經以「好好好好好好朋友」六個好字形容與阿嬌的關係，至今他仍然稱呼對方為好好好好好好的朋友，他最欣賞對方夠率直，但從來沒有想過與她更進一步，Juno說：「𠵱家我同佢都係六個好，我之前係已經認識佢不過唔係咁熟，後來合作拍《破事兒》就開始熟，我欣賞佢份人夠率直，圈內差不多年紀嘅好朋友真係得佢，之後就要數到關淑怡同倫永亮啦。」當記者說笑問Juno為何不與阿嬌發展成十個好的好朋友，他笑着回答：「我當初都冇斟酌有幾多個好字，亦都冇諗過點樣同佢更進一步，佢係女性大家先會將我哋關係諗得複雜。」
疑似藝人淫照風波爆發後，Juno每次回應都表現得十分維護阿嬌，對於陳冠希的評價更是絕不留情。Juno解釋換轉是另一位好朋友均會作同樣的回應，他說：「不論男定女，總之朋友受到傷害，我保護佢係好正常嘅事。」原來Juno與阿嬌一星期會聯絡兩三次，平時多以sms通消息，他認為好朋友之間最重要是溝通，他續說：「我真係冇諗過同佢有另一種關係，我哋都好明白大家，我哋成日都有溝通。其實件事都過咗咁耐，大家唔好再提啦，每一個人都要繼續生活。」
同陳冠希冇嘢好比
至於事件中另一位主角陳冠希，Juno強調一開始沒有想過與對方比較，原因是沒有需要比較，他說：「人人都唔同，有乜嘢值得比呢？嗰件事發生咗我回答記者時每一句說話會變得好敏感，我同佢方向唔同，佢返唔返香港娛樂圈我唔會評論，呢個唔係我工作範圍。」
六年來Juno得到的批評絕對多過讚許，一年做一張唱片被人錯覺是唔憂做，他澄清做音樂是重質不重量，他說：「每次做唱片我唔想草草了事，呢幾年我搵咗好多前輩合作，慶幸評價都係好，好多人聽咗我嘅碟都對我改觀。」由不受歡迎人物漸漸為人接受，Juno覺得轉捩點是加入SillyThing後製作了好質素的唱片，大家聽過他的音樂明白他入行絕不是玩玩吓。
不奢望討好所有人
最後問到Juno有沒有守得雲開見月明的感覺，他反而覺得以前日子是一個好好的經歷，他說：「我份人一向都好樂觀，我唔奢求人人都鍾意我，人哋把口我控制唔到，人哋讚我我會開心，鬧過我我又唔會怨，再上頒獎台我唔擔心再俾人噓，因為我好認真去對待呢份工作。」
