日本組合SMAP前日喺北海道完成巡迴騷之後，喺當地新千歲機場坐飛機返東京時，就搞到飛機延誤起飛。當日SMAP為咗避免引起機場混亂，於是連同工作人員共15人由其他通道上機，當架機喺跑道行駛，準備起飛之際，先至被發現冇做正常嘅登機手續，上機人數又同登機證數量不符，搞到架機要返回閘口做確認手續，遲咗成48分鐘先可以起飛。