蘇施黃（阿蘇）主理的《蘇Good》寸爆嘴，原來鏡頭外的她一樣冇面畀，對着不順她心意的導演和助手一樣照鬧，她自嘲說：「我煮緊嘢嘅時候成隻癲狗咁㗎！」但其實阿蘇心裏一直很感激一眾製作人員，更大讚他們：「好抵得諗，好搏命！」
撰文：懷鈺
蘇施黃自主持煮食節目以來，以鬧人及寸爆見稱，觀眾看她主持節目看得過癮，令她走出收費電視觀眾群，被無綫力邀主持煮食節目《蘇Good》，阿蘇更向無綫開出史無前例的「阿蘇話晒事」條件，要用她的製作班底拍攝。早前播出第一輯《蘇Good》反應良好，阿蘇在無綫台慶頒獎禮中奪得最佳節目主持獎後，無綫乘勢再推出第二輯，她的話事權更大，她自家的製作班底當然居功不少。
「佢做唔到我要求」
阿蘇日前接受本報記者專訪，她說：「所有嘅製作人員都好搏命，我又拍得快，又長時間，未拍晒我又唔畀人收工，所以真係好辛苦，佢哋真係好抵得諗。」但阿蘇對各工作人員也有不同意見，在《蘇Good》中，幕後人員不時出鏡試食、煮嘢，對於外間有傳她鬧走助手Kandy，患有類風濕關節炎的阿蘇解釋說：「唔係鬧走！佢都做唔到我要佢做嘅嘢，60集節目又差唔多拍完，咁咪……其實點解要搵個人做我節目嘅助手，係因為我切唔到嘢，所以嗰個人要係幾識得呢啲嘢，佢初初認為佢得，但係同我嘅要求距離好遠囉，佢真係幫唔到我要佢幫我嘅嘢，你知煮嘢分秒必爭，遲少少都燶啦，點可以慢嘅啫！你問吓佢（身旁助手），我煮緊嘢嘅時候成隻癲狗咁㗎，timing好緊要。」
與阿蘇曾在商台主持節目的泰山，在《蘇Good》中與阿蘇只是出外吃東西，阿蘇對他的印象很好，指他真心、人品純良，阿蘇說：「我又冇要求佢幕前嘅定位，但出唔出到位就要睇佢叻唔叻仔喇，我覺得佢嘅表現可以更好，可能因為佢忙電台，可能佢又好驚我，我咁惡，大家喺電台合作開。你睇佢個樣好似好惡咁，其實佢係隻貓仔嚟㗎，佢唔會同人爭嘢，又好care人哋感受，所以做電台、電視台呢啲就爭緊啲喇，佢根本冇一個強嘅character。」
負責節目搜集資料及撰稿的「斧頭E」性格鮮明，阿蘇笑說：「斧頭E都無啦啦彈出嚟㗎，因為佢成日打斧頭，又叫Eva，所以咪叫『斧頭E』囉。如果我哋有啲嘢唔見咗，都會話係佢攞咗㗎。佢又好好笑喎，當大家好專心切嘢嗰陣，佢會無啦啦問啲問題『阿蘇呀，乜乜乜？』因為佢好驚deadair，所以個個靜晒嗰陣，佢就會問啲無關痛癢嘅問題，所以好好笑。」
鬧到導演狗血淋頭
阿蘇表示當中由有線合作至今的攝影師「聰明人」，對於她來說是一個意外驚喜，她說：「呢個節目我唔管製作，所以佢哋搵乜人我唔會知，第一日開工佢哋就畀咗個surprise我，我成隊crew只係識得兩個人，兩個都係攝影師，其中一個就係聰明人。」
最後阿蘇要特別鳴謝節目中兩位導演，她說：「呢60集嗰兩個導演我真係要畀好多credits佢哋，因為同我拗又拗唔到，又俾我鬧到狗血淋頭，但佢哋真係好好，因為鬧完轉過頭佢哋又會冇嘢，返嚟做嘢。人有脾氣，佢哋又已經係導演，嚟到呢度又做番阿四。」
「人哋會收錢試食」
阿蘇在節目中的火爆性格深入民心，談到從前經常在有線節目中鬧人，她自言在主持無綫《蘇Good》已沒再鬧人，她說：「我喺TVB呢幾集邊有鬧人啫？同Cable唔同性質，可能以前嘅人會收錢去試食，好多都未食過就話好味，同埋啲人可能以為搵咗阿蘇去食就發達，但又唔知佢哋啲嘢有幾難食，冇人可以畀錢我去介紹。我做呢60集，全部都係我去過好食嘅先會介紹，咁我又點會鬧人呢？」
人神一視同仁
節目內不鬧食肆，但阿蘇在鏡頭外繼續鬧人本色，《蘇Good》的工作人員都曾被她責罵，她又不准工作人員在工作時傾談，她說：「我見到佢哋傾偈我鬧㗎，點可以唔專心做嘢！一定要200%專心，因為佢哋要諗下一步要做啲乜，呢個係工作態度，但其他時間當然可以講笑。」
阿蘇自言從小說話已晦晦氣氣，問她是否對每個人都這樣晦氣？她想了一想，詢問身旁的助手，助手答「是」，阿蘇猶豫地說：「媽媽呀，佢未老人癡呆前都係咁上下。」那麼身為基督徒的她，若對着耶和華也是否如此？她笑說：「耶和華我都係咁，佢點會唔知我係乜人啫！」
話你知：6pair半際遇迥異
早年蘇施黃加入商台做DJ後，於1979年與另外12位年輕DJ及幕後人員組成「6pair半」，成員包括湯正川、鍾保羅、楊振耀、梁安琪、盧業瑂、錢錢、關西蒙、俞琤、曾路得、陳少寶、朱明銳和樂仕。
俞琤成揸弗人
眾成員際遇不一，俞琤現時是商業電台副主席；楊振耀現職商台顧問；陳少寶則於新城知訊台主持節目；朱明銳現職新城知訊台台長；盧業瑂現於加拿大溫哥華中文電台主持節目；曾路得則成為香港著名歌唱老師；樂仕就擔任老牌外國歌手來港舉行演唱會的搞手。
湯正川據悉在內地從商；梁安琪現職法律行政人員並投身政壇；關西蒙與錢錢分別於早年移居外地；鍾保羅則不幸於1989年自殺身亡。
後記：攝影師成炮灰
蘇施黃在訪問中表示嚴禁工作人員在工作時間閒聊，於訪問完畢後，攝影師邀請她到另一邊的佈景拍攝，她認真地擺出各種生鬼表情，攝影師一邊拍攝一邊跟她說：「好鍾意睇你嘅節目，仲試過你教嘅嘢食㖭……（下刪數十字）阿蘇呀，可唔可以再擺多次你做嘅動作呀，因為……」阿蘇即勞氣地說：「我咪就係講你呢啲一路做嘢一路傾偈嘅人囉！」
攝影師想解釋因閃光燈要回電，故未能將阿蘇開心一面攝入鏡頭，但她未有聽他解釋。其實攝影師只希望以說話來緩和氣氛，令讀者看到「鬧人」另一面的阿蘇，攝影師卻成為了今次訪問的犧牲品！
