神七太空人同一班演藝界人士星期日會喺香港大球場舉行大滙演，表演嘉賓之中，包括有「中國木村拓哉」稱號嘅世界級鋼琴家李雲廸，今次佢以香港人、即係東道主身份參加，所以格外興奮喎。
李雲廸星期日會為大滙演打頭陣，到時會彈奏一首李斯特嘅作品《鐘》，據知曲目要演奏技巧同詮釋能力達到「琴我合一」境界嘅人至能夠發揮，對李雲廸係極高難度嘅挑戰。
唔講唔知，原來李雲廸同太空人早結淵源，但唔係今次訪港呢三位，而係第一個升空嘅中國太空人楊利偉。03年楊利偉嚟香港時，咁蹺同李雲廸住埋同一間酒店，又咁啱兩個人喺酒店大堂撞到正，仲一齊影咗張相留念㖭。