雖然《保持通話》被人勁讚外國原著劇本寫得出色，但看後不難發現太多「咁都得？」的犯駁位。不過奇又奇在，電影因為節奏太緊湊，近乎沒有冷場的情況下，觀眾又看得心服口服，「媽聲」甘願吞回肚子裏。DVD已經報到，不妨一看這套邊鬧、邊要睇，而且又識賺錢的港產好電影。
記者︰陸俊雄
攝影︰陳盛臣
三大犯駁位
首先，若是支持創作精神，覺得「聽古不要駁古」的話，這三大犯駁位也是全戲最精妙過癮之處。第一位，不用爭，一定是徐熙媛竟然駁得返那個爛鬼電話，沒有這個電話，全套片根本不成立，只怪樊少皇點解唔將個電話再打碎啲。另一個「有冇搞錯」的地方，是古仔連人帶車再帶電話飛插汽水車一幕，官能刺激十足，幕後花絮中也有解構這場大龍鳳。車都翻了人也「爆缸」，但那電話仍然健在而且還在保持通話中，創作果真天馬行空。第三處必看是最後古仔大戰劉燁，實情係前者捱打還差點跌死。在他「FreeFalling」過程中，運用了那百分之唔知幾多秒發出了拍下劉燁罪證的MMS。老實講，連我阿媽一介婦孺在戲院看過此幕後，回來也大罵「咁都過到骨？」可惜劉燁最終是跌死，那個MMS沒有將他繩之於法。
客串祖藍好搶鏡
男女主角七情上面，令觀眾也看得肉緊。至於王祖藍在「Mo記」客戶服務中心客串的一幕，時間雖短，但令人印象深刻。看到他那卡通式的鄙視眼神，激到趕時間的古仔最終要拔槍，看得人捧腹大笑，在緊湊的節奏下加上了輕鬆的小點綴。
BONUS 收數不成反貼錢
古仔飛車飛得厲害，想知邊度加工？邊度打真軍？幕後拍攝花絮固然要睇，但更值得推介的是「刪剪片段」這部份。想過古仔上門收數那一幕原來有下文嗎？戲中只見他開門見到一班大漢恐嚇母子後，心軟不願多插隻腳埋去。原來，實情剪了一段古仔幫母子出頭，鬧走其他收數佬後，更貼錢給婦孺才離去，幾咁宅心仁厚。不過古仔忠忠直直的角色扮演，學人做收數佬都係純粹得啖笑，玩吓出人意表啫。
《保持通話》DVD雙碟版$87
