詹瑞文去年開騷扮智能大師狂踩無綫和陳志雲，惹來二人不和傳聞，事隔一年，詹Sir在炮轟亞視後，前晚與陳志雲於一雜誌頒獎禮上寃家碰頭，二人不但未有面左左，而且更前嫌不計有講有笑，甚至扮老友握手合照。
去年詹瑞文疑因在舞台劇《萬千師奶賀台慶》中扮港姐及陳志雲而遭無綫封殺，令其主持的兒童節目被抽起，之後詹Sir正式演出時毫不留情地狂踩志雲和無綫，扮智能大師更影射陳志雲女扮男放屁，令雙方關係更惡劣。
自爆經常通電
不過，世事無絕對，就在前日詹Sir狂轟亞視高層誹謗他在亞姐決賽上篇中露毛演出，並臨時辭演後，他卻在前晚於中環置地廣場舉行的《君子雜誌》20周年派對暨頒獎典禮上，跟陳志雲寃家碰頭，二人與古天樂、葛民輝、王晶及任達華等齊齊獲選「MenoftheYear」。活動上，陳志雲與詹Sir不但狀甚老友有講有笑，而且二人甚至握手讓記者拍照，相當識做。
記者問詹Sir是否與陳志雲和好如初時，他表示平日也有跟志雲電話聯絡，並當着眾人面前向志雲說：「佢哋唔信我平時有打畀你。」陳志雲透露每次詹Sir有舞台劇公演也會邀請他欣賞，可惜自己多次因事錯過。
有誤會冇封殺
記者問會否邀請詹Sir出席《志雲飯局》時，陳志雲說：「好呀！詹Sir不嬲介紹佢啲舞台劇畀我，我哋個節目《十年》都有請佢啦。」被問是否不和時，陳志雲否認道：「冇，點會呀。工作上嘅誤會可能有，但封殺就冇。」詹Sir隨即附和說：「黑面都冇。」
有記者問當日是否因為詹Sir亮相亞視而遭無綫封殺，陳志雲否認說：「唔關事，佢唔係我哋合約藝員，去邊個電視台都得。」問陳志雲對詹Sir炮轟亞視睇法，陳志雲拒作評論：「唔適合評論人哋電視台嘅嘢，因為我唔清楚當中成件事。」
此外，前晚出席活動者還有賈曉晨（JJ）、古天樂、陳鍵鋒、王晶、譚凱琪（Zoie）、張嘉兒和關心妍等等，但眾人風頭全被詹Sir和陳志雲蓋過。
採訪、攝影：藍文浩
