𡃁界女模Angelababy前晚夥兩位大師姐熊黛林（Lynn）及姚書軼出席月曆義賣活動，作為家庭收入支柱的Angelababy今年收入豐厚，聖誕會忙於搬到千五呎大屋，更希望緋聞男友陳偉霆送紅色心形地毯作入伙禮物。榮升為小富婆的Angelababy透露09年願望可置業做收租婆。
熊黛林及姚書軼所屬的Style模特兒公司，前晚於尖沙嘴海港城作慈善義賣，連同其他月曆女郎包括小師妹Angelababy、內地模特兒劉丹、戴小奕及曾與小小超傳緋聞的陳碧舸等齊齊現身，當中小師妹Angelababy最為受歡迎，有不少fans為她吶喊，風頭力壓兩位大師姐。
要男友送地毯
今年事業大豐收的Angelababy，表示聖誕會忙於搬屋，她說：「不嬲都同屋企人住，將會由幾百呎嘅屋，搬去九龍城，租一間千五呎大屋，因為𠵱家租金平，只係萬幾蚊，所以下年先計劃買樓，呢個係我09年目標，想買一間細啲樓投資收租。」問她會否要緋聞男友陳偉霆送大床褥，Angelababy即笑說：「我同屋企人住，唔使啦，用番舊屋嗰張就得，不過你哋叫佢送張紅色波斯地毯畀我。」問她是否想收心形地毯，她說：「冇所謂。」
Angelababy昨日以pushup造型出席內衣騷活動，談到對內衣的喜好，她說：「鍾意波點圖案嘅款式，都好肯使錢買內衣，因為覺得着咗靚內衣，心情都會好啲。」問到她會否考慮隆胸，她笑說：「好多人都問我，諗起都好痛，𠵱家有pushupbra同nudebra幫助。」但她暫時無意行內衣騷，她說：「除非有好多錢，因為想留番啲好嘢喺寫真。」
黛林唔識鹿鞭
此外，熊黛林透露將會到北京人民大會堂出席電影《葉問》首映，她坦言心情十分緊張，問她會否送戲票給緋聞男友郭富城，她表示：「佢喺台灣開演唱會。」城城近日比前消瘦不少，問她會否煮鹿鞭給城城進補，她說：「唔識乜嘢鹿鞭，佢有好多人照顧佢，唔使我。」問她今個聖誕會否再「上門」跟城城家過節，她即報以「嘻，嘻」兩聲。
採訪：RitaLeung、JessicaNgan
攝影：RickyIp、MatthewLam
