美國前總統克林頓旋風式訪港噚日結束，雖然時間匆匆，克仔仍不忘裝身。Sam'sTailor嘅印度裔老闆Sam同八方講，克仔星期一去到佢尖沙嘴舖頭揀料做西裝，星期三就起貨，「我不可透露他訂了多少件，只可說很多，其實他出席很多大型場合所穿的『戰衣』，都出自我們的手。」幫克仔做裁縫16年，但Sam堅拒透露克仔身材尺碼，據講原來啲政要驚呢啲資料會暴露健康情況喎。
Sam嘅裁縫店開咗51年，《時代》周刊曾經選為亞洲最佳西服店，查理斯王子、喬治布殊、已故歌王巴伐洛堤都係客仔。Sam話西裝每套五千至兩萬蚊不等，唔少打工仔亦有捧場，「裁縫面前人人平等。」