呢一輪凡有朋友請吃飯，客人以男士為主，本來香港已經甚為西化，主人家請客，一定係請埋先生夫人嘅，點解呢排只係見男士多啲呢？會計Ｃ講先：「聖誕前就係學校考試之期，太太要留在家中督促個女做功課、溫書，唔肯嚟。」一唱百和，幾位男士齊聲話啱啱啱。原來太太就係家庭補習老師，一到考試期間，就緊張到極，點都唔肯出夜街跟隨老公去吃應酬晚飯。其中一位男士話：「老婆全副心血放在女兒身上，完全忽略我嘅存在，到女兒中學畢業，老婆已經忽略我十四年！」
男孩女孩讀書要咁緊張，究竟為乜？左丁山做個小調查，發覺佢哋幾位嘅仔女皆在半山名校，油麻地名校，九龍塘名校，尖沙嘴名校就讀，好多人認為仔女入到呢類學校，相等於中咗小搖彩。呢類學校有個特點，就係你嘅仔女考到87分，都會俾班主任召見，對你講一聲：「恐怕貴子弟成績追唔上，請你注意，督促吓，否則難以保證本校中一有學位畀佢。」一位左丁山好朋友就碰上呢樣情況，搞到佢一怒之下，將女兒轉到去一間國際學校，佢兩公婆日日要返工，冇請補習老師，女兒讀書係自動波，精乖伶俐，讀書考試平均有87分，佢已經歡喜到極，料不到遭受班主任訓話也。在呢啲名校讀書，冇阿媽日夜跟住，冇補習老師嘅話，唔知點樣可以生存，因為除咗成績要好之外，游水打波樂器等等都要玩得好，你話做阿媽嗰位，係唔係做到頭暈？一位心理學家同左丁山講：「本地名校學生與學生之競爭，其實亦係家庭實力之競爭，更係啲mothers（一眾媽咪）嘅面子競爭，Ｃ太唔肯輸畀Ｂ太，Ｂ太唔肯輸畀Ａ太。」
咁樣競爭法，有乜好處？測量Ｂ話：「有㗎。我個女唔夠人爭，老婆心有憂鬱，於是我舊年就送咗個女去英國寄宿學校，佢本來在本地學校全班考第三十名，去到英國竟然考全級第一，校長話佢係可造之材，𠱁到我老婆不知幾高興，香港學生過到去考GCEOLevel，攞十個八個Ａ，唔係難啫！」咁醒，咪直入劍橋？會計Ｃ係留學英國過來人，佢立即話：「入到大學，我哋香港學生又未必夠鬼仔鬼妹醒喎，人哋嘅分析力比較強！」