【本報訊】「金融海嘯下經濟已經唔好，新政策就更加難做……！」政府推出「短加長減」觸發罷駛風波，無論紅的、綠的也齊聲和應；因參與圍堵公路被捕之王海強多年來以的士為家，因為要供車會及養家，即使腰間有凸起的肉瘤也不敢求診，就是擔心「手停口停」生計受損。
堵塞北大嶼山公路、涉嫌在公眾地方行為不檢被捕的新界的士司機王海強（53歲），折騰一整夜，匆匆吃頓早餐，昨晨10時許又開車到機場，回復排隊等客的日子。
唔知點捱落去
王海強駕駛新界的士超過20年，5年前以210萬元買的士牌晉身車主行列，不過他沒有將車出租「總之多勞多得」，結果的士成為第二個家，實際逗留時間比在家還要多。
他說，「金融海嘯下經濟已經唔好，新政策就更加難做，客人都跑去坐紅的……排幾個鐘先一個客，仲要係去廸士尼百幾蚊。真係唔知點捱落去……！」他說時竟掉下大滴大滴的男兒淚。
因為長期坐在的士上之王海強，如水桶般大的肚腩近腰間位置，長出的肉瘤雖不明顯但仍隱隱作痛，王海強老淚縱橫越說越傷心，「5、6年喇，唔敢去睇醫生，我驚要做手術，一住個幾月成家冇飯開呀！」妻子做兼職，女兒做售貨員，他除要供車會外，更是家中收入主要來源，「個仔中學畢業就失業，搞搞吓有思覺失調，要睇醫生……唉……！」
王海強訴說，政府推出的市區的士「短加長減」，直接影響新界的士司機收入，新收費推出後令他每日的收入減少了4、5成。
市民意見
《影響秩序》
吳先生：「的士司機咁做唔係幾好，影響社會秩序。警察清場係啱嘅！我同情司機，但應該用理性溫和嘅手段。」
《爭取權益》
張先生：「支持司機爭取權益嘅行動，但係亦好贊成政府的做法，列出收費，提高的士收費透明度。」
