江若琳近日與師弟Square合唱新歌《茶杯裡的愛情》，五隻嘩鬼日前拍攝MV時嘈爆現場，又開大食會，江若琳卻偏偏因為腸胃不適未能大快朵頤，但Square竟用食物在鏡頭前引誘師姐，連累她狂吃NG，難怪她拍完後要大肆拆屋。
江若琳和同門的男子組合Square，最近拍攝了合唱歌《茶杯裡的愛情》MV，五人一同演出，由於他們都是愛講爛gag的年輕人，所以不用roll機時即雞啄唔斷。江若琳表示過往拍攝新歌MV都只有她一個人演出，但這次多了四位師弟陪伴，感覺得熱鬧得多。
自認玩到癲
休息期間，Square又叫了大堆外賣，但碰巧師姐江若琳的腸胃不舒服，不敢亂吃，當她埋位拍攝時，Square卻不停拿着pizza在鏡頭前引誘她，結果江若琳不但沒pizza吃，還頻吃NG，她投訴說：「Square佢哋累我吃NG，太過份，好唔掂，我平時最鍾意食pizza，偏偏個肚唔爭氣，食唔到，見佢哋食得咁滋味，我梗係唔抵得。」
導演安排拍攝的廠景，利用一層又一層的白紙貼上去，營造一間紙屋的感覺，江若琳和Square又穿上白色衣服配合，五人拍攝完畢即大做破壞王，把紙撕掉，乘機發洩一番，江若琳都玩到不顧儀態，她說：「我玩起上嚟都幾癲㗎。」
戀愛學成長
這首歌講述情侶分手，再見亦是朋友，江若琳說：「其實情侶之間，如果大家係因為性格不合要分開，關係唔係太僵嘅話，我係接受同前男友做番普通朋友。」Square的James也非常認同說：「組成Square前，我同以前女朋友分咗手，𠵱家大家仲係朋友，會互相支持同關心對方，男女分手係可以學識成長，雙方都會從失敗經驗中，學識下次再拍拖，點會對人好啲，咁樣下次拍拖就唔會犯番相同嘅錯。」
採訪：比華利