唉！又少一間！於中環開業超過半世紀的「蛇竇」樂香園，因舖位被時裝名店用高價租走，最後只好忍痛結業，做到今個月尾31號，就跟一班在這裏打躉多年的熟客講拜拜。要品嚐有菠蘿味的菠蘿包、餡料滿滿的雜批、美味的沙嗲牛，還有一杯茶香撲鼻的奶茶，就要把握最後機會，入「蛇竇」鬆一鬆！
記者：周靜雯
攝影：林栢鈞、譚盈傑
蛇竇之名只此一家
提起樂香園，未必人人曉，但一講「蛇竇」，就一定知道係邊間。正如樂香園老闆鄺先生都話：「只要在中環返工，一個月內必知蛇竇所在！」由四十年代位於戲院里地庫的舊舖，後搬到威靈頓街現址，餐廳便馳名中環六十年。店內一句「中環蛇竇六十年不變只此一家」，更能凸顯餐廳在該區的地位。叫得「蛇竇」，當然有唔少打工仔鍾意來「蛇一蛇」，郵差、電話公司員工等，都鍾意來飲杯奶茶食個菠蘿包，唞夠再開工。就連富豪、議員都係捧場客，「有位富豪日日都叫司機來買菠蘿包，每次都係買四個。」甚至有議員曾經在餐廳開記者會、有大肚婆幫襯期間突然作動都遇過。
難忘熟客仔
鄺老闆接手蛇竇廿多年，年屆八十的他看盡人生百態；面對餐廳無奈結業，亦處之泰然。原來早在今年六月，業主已跟他洽談租金事宜，「有間大公司，好似話係做時裝的，出到成36萬來租個舖位，我現在交12萬8千元租都係剛剛好，加咁多點負擔?!」臨別在即，鄺老闆最唔捨得是一班熟客，「這裏的人客都好好，就算我找多錢或收少佢錢，第二日一定畀番我。」結業消息一傳出，好多熟客都關心餐廳去向。鄺老闆說，大概農曆新年後才找新舖，「最緊要搵番原區，要照顧熟客嘛！」這種老闆店員與人客之間建立的人情味，正是舊式茶餐廳最無價的滋味。
必食菠蘿包雜批
來到蛇竇，怎可以不食菠蘿包？這裏的菠蘿包比坊間的細一點，但味道卻令人難忘，因為它是一個真係有菠蘿味的菠蘿包！菠蘿包的精要所在是頂部的脆皮，師傅在整脆皮時加入菠蘿茸，每咬一啖都嚐到果香。另外，批類亦不能錯過，這裏的批餅皮非常鬆化，如果太大啖咬下去，隨時弄得滿枱都是碎屑；雜批用了午餐肉、雞蛋及青豆作餡料，味道比雞批豐富。其中一個出爐時間為下午三點多，有唔少人都幾件、半打雜批雞批咁買外賣，相當受歡迎。能夠一口雜批一口奶茶，嘩！這個下午茶夫復何求？樂香園於月底就結業，要品嚐「蛇竇」之美味，就要把握最後機會。
鄺老闆：找到新舖後，一定會將「蛇竇」這個招牌帶過去。
夥計陳小姐：在這裏做了四年多，最唔捨得一定係班熟客，另外當然就係好老闆啦！
食客葉先生：我來自馬來西亞，每次來港都到這裏飲奶茶同食麵包。原來這裏要結業嗎……
食客李先生：幫襯了十幾年，最唔捨得係菠蘿包同雞尾包。希望老闆可以快點搵到新舖。
樂香園㗎啡室（25236391）
中環威靈頓街15號C地下
到地庫繼續「蛇」永樂園
好彩仲有佢！打工仔仍有個「靚竇」可以唞吓。以雙腸熱狗王馳名的永樂園，亦是另一家在中環無人不曉的餐廳，地面外賣部加埋地庫堂食共有四千多呎，地方雖大，在午市同樣逼得水洩不通。下午茶時段，會較易找到靚卡位，坐在舒適的沙發椅上，吃住熱狗鬆一鬆。小記採訪當日真係有幾位茶客在餐廳小睡片刻！地庫收唔到電話的情況，現已改善，咁就唔怕上司搵自己唔到啦。
這裏的熱狗出名，原因之一是秘製醬汁，令香腸的香味更突出，並將麵包和香腸的味道融合，令人咬第一口後便不想停下來。很多人都不愛吃酸青瓜，因其醃菜味太濃，但這裏醬汁中就加入切碎了的酸青瓜，更易入口。黎老闆更大方透露秘製醬汁的材料，有鮮牛油、酸青瓜及雞蛋等，醬汁每日在廚房新鮮製造，由於日售過千隻熱狗，一日要用四、五個大桶的熱狗醬，厲害！
永樂園餐廳（25220965）
中環昭隆街19號地下