財務Ｆ在山頂豪宅請吃晚飯，Ｆ夫人親自監製，Ｆ太係一名大賓架，鍾意入廚，但晚晚七點後先至放工，邊度有時間日日煮飯吖，只有在請客嘅日子，Ｆ太先至拿出時間，一早準備好，叫菲傭入廚依法烹製。呢晚Ｆ太又係晚上七點幾先至返到屋企，未換衫已經入廚指揮，個零鐘頭之後，我哋就埋枱食飯。
財務Ｆ話平時兩公婆食飯，餸菜好簡單，一味少油少糖少鹽，晚晚食健康菜譜，醫生曾經同佢講：「Ｆ先生，你鍾意食藥還是鍾意美味食物？」財務Ｆ話：「我當然喜歡美食，如果因此而日日要吞一粒半粒Lipitor，我唔介意㗎。」既然咁講，醫生畀藥佢食，財務Ｆ從不戒口，但返到屋企，食乜嘢由太太話事，變相戒口，只有在請客之日，先至可以吃個痛快。
Ｆ太呢晚特製賴尿蝦、鵝掌鮑魚、魚翅、蒸海斑、燒豬頸肉，加上臘味飯，美味之至。客人連聲讚好，語出真誠，並非擦鞋，地產Ｃ話：「我在名店食過唔少鮑魚，今晚Ｆ太呢一餐，外面就叫做九頭鮑㗎嘞。」Ｆ太連忙澄清：「十四頭啫，唔係九頭。」地產Ｃ話：「我知，但市面食肆經常蝦人唔識，呢類十四頭鮑就當作九頭鮑咁賣。」左丁山甚少到名店食鮑魚，乃大鄉里一名，根本分唔出十四頭與九頭之別，地產Ｃ話左丁山就係食店「好客」（或稱羊牯）嘅典型！
財務Ｆ食得特別開心，呢晚完全忘記乜嘢叫做少油少糖少鹽，佢話之前幾晚與大賓架Ｃ一齊出席大人物晚宴，大賓架Ｃ同佢講，返親屋企食飯都係少油少糖少鹽，清淡無比，皆因太太嚴格控制。當今健康食譜成為潮流，啲大人物、大富豪、大賓架等等在家皆盡量不吃山珍海錯，盡量以「無味道餸菜」為主。財務Ｆ及太太係明白人，在家請客時，就迎合客人口味。記得某年某月某日，某大人物請左丁山到山頂豪宅吃晚飯，好似《水滸傳》花和尚魯智深話齋，吃到口裏淡出鳥來！多謝一番告別之後，急急回家食碗日本一番麵！此亦是左丁山冇發達嘅原因之一，人哋大人物嚴守規律，朝朝吃一碗滾水沖麥皮做早餐，嚴控膽固醇，唔似得左丁山呢類俗人咁冇自律，竟然夠膽食雞尾包、菠蘿油、熱狗做早餐也。