𠵱家經濟唔好，全高清電視機跌到一萬蚊都有交易。小藍唔少老友，買部高清電視睇數碼廣播，駁埋部遊戲機打機，聲畫效果更加一流。好似呢個月19日舉行嘅亞洲遊戲展，參展商PlayStation一次過大晒冷，展示60款全新Blu-ray高清遊戲碟畀機迷試玩。其中一款最啱女仔玩嘅當然係PS3第一款體感式遊戲「全喵推桿高爾夫」啦。
一邊遊戲一邊運動
小藍都唔等亞洲遊戲展，早幾日踩到Sony尖沙嘴辦公室，玩吓佢部新game體感貓。點知俾兩個美少女霸住嚟玩，仲扭埋條腰嚟揮桿，好鬼Sexy。佢哋話隻貓貓好可愛，又可以一邊玩遊戲一邊做運動好盞鬼。
呢排頻頻上電視嘅PS3香港阿頭James話，今次係PS3首次推出體感式遊戲，同Wii爭吓，希望吸引多啲女仔同家庭客玩機。遊戲入面嘅貓貓叫TORO，喺日本好受女仔歡迎，佢今次仲係第一次出國嚟香港，會同佢向公眾誠徵中文名。
小藍又玩明年2月先出街嘅KilZone2射擊遊戲，配合埋50幾吋嘅全高清LCD，黑位嘅彈窿，細節都睇到；再玩戰機遊戲TomClancy'sHawx，子彈、導彈橫飛，加埋聲效，真係好似睇戲咁。James話，全部新遊戲會擺晒喺遊戲展畀入場人士免費試玩，外面打街機都五蚊局啦。佢話𠵱家時勢唔好，度緊現場以海嘯價賣碟。
逢周六刊出